Cаха сиригэр эһиилгиттэн Кыргызстан посольстватын кэнсилээрийэтэ арыллыаҕа. Бу туһунан Дьокуускайга Кыргызстан Арассыыйаҕа суһал уонна боломуочуйалаах посола Аликбек Джекшенкулов кэлэ сылдьан эттэ.
“Кэнсилээрийэ киэҥ хабааннаах үлэни толоруоҕа. Биһиги гражданнарбыт пааспардарын оҥорторор, оҕо төрөөбүтүн туһунан туоһу суругу, ыал буолбуттарын бигэргэтэр туоһу суругу, ыспыраапкалары уонна да атын докумуоннары миэстэтигэр толотторор кыахтаныахтара. Маны таһынан, биһиги, биллэн турар, миграннарбытын хонтуруоллуур уонна өйүүр буолуохпут. Кинилэр Саха сирин тыйыс усулуобуйатыгар адаптацияны ааһалларыгар, бүгүҥҥү баар кыһалҕалары туоруулларыгар төһүү буолуохпут”, - диир Аликбек Джекшенкулов.
Саха сирин басткы вице-премьерэ Алексей Колодезников көрсүһүү кэмигэр олохтоох култуураҕа, үгэстэргэ ытыктабыллаахтык сыһыаннаһыы хайаан да баар буолуохтааҕын тоһоҕолоото. “Биһиэхэ кэлэн үлэлиир Кыргызстан гражданнарын посольство хонтуруоллуура хайаан да наада”, - диэн эттэ.
Посол кулун тутарга Владимир Путин Кыргызстаҥҥа сылдьан Арассыыйа субъектарын кытары биир былааннары олоххо киллэрэргэ дуогабардаспытын туһунан эттэ. Кини эрэгийиэннэргэ саҥа талыллыбыт бэрэсидьиэн сорудаҕынан сылдьарын туһунан эттэ. “Кыргызстан бырааттыы саха норуотун, Саха сирин кытары икки өрүттээх хардарыта сыһыаннары олохтуурга интэриэстээх”, - диир посол.
2020 сылга Кыргызстаҥҥа Арассыыйа, оттон Арассыыйаҕа Кыргызстан хардарыта сыһыаннарын сылынан биллэрилибит. Инньэ гынан өрүттэр бу хайысхаҕа ханнык тэрээһиннэр ыытылыахтарын туһунан кэпсэттилэр. Саха сирэ Кыргызстаны кытары атыыга, эргиэҥҥэ, гуманитарнай хайысхаҕа уонна миграционнай бэлиитикэ тоҕоостоох боппуруостарыгар бииргэ үлэлэһиэхтэрэ. Бу туһунан СИА иһитиннэрэр.
Источник: ЯСИА
