Бүлүү бөлөх улуустарыгар быыстала суох уунан хааччыйыы бырагыраамма чэрчитинэн, Бүлүү куората, Халбаакы (Бүлүү улууһа), Кэнтик (Үөһээ Бүлүү), Ньурба куората, Октябрьскай оройуон, Үөһээ Бүлүү, Наахара уонна Илимниир (Сунтаар улууһа) ууну баһар сабыс-саҥа 10 массыынанан (ГАЗ 3309 уонна КАМАЗ-43523-3010-69) хааччылыннылар.
“Саҥа спецтиэхиньикэлэр “2019-2024 сылларга Бүлүү бөлөх улуустарын быыстала суох уунан хааччыйыы бырагыраамма” чэрчитинэн атыылаһылыннылар. Хампаанньа бу сылга бырагыраамма тэрээһиннэрин олоххо киллэриигэ, ону таһынан, ууну баһар массыыналары атыылаһыыга 150 мөл солк суумалаах үбүлээһини, үүнэр көлүөнэ тус сыаллаах пуондатын нөҥүө көрдө. Биир ГАЗ массыына сыаната – 2 мөл 780 тыһ солк, КАМАЗ – 3 мөл 905 тыһ солк. Уопсай суума 33 мөл 425 тыһ солк тэҥнэһэр. Бырагыраамманан үлэ өссө да салҕанар. 2024 сыл түмүктэниэр диэри өссө алта тиэхиньикэ кэлэрэ былааннанар”, – диэн “АЛРОСА” хампаанньа СӨ судаарыстыбаннай былаас уорганнарын кытта үлэлиир салаа начаалынньыга Ладимир Аргунов иһитиннэрдэ.
5 ГАЗ уонна 5 КАМАЗ саҥа массыыналар Магадантан уонна Вологдаттан кэлбиттэр. Саҥа тиэхиньикэлэри ГИБДД-га учуокка туруоруохтара. Алтынньы 7 күнүгэр үөрүүлээх быһыыга-майгыга күлүүстэри туттардылар.
“Саҥа массыыналар баар кыһалҕалары быһаарарга төһүү күүс буолуохтара. Бу биһиэхэ олус үөрүүлээх түгэн. Ыраас ууну олохтоохторго тиэрдэр судургу буолуо диэммит эрэнэбит. Урут коммерческэй тыраанспарынан таһар этибит. Билигин бэйэбит анал тиэхиньикэлэннибит”, – диэн Кэнтик нэһилиэгин баһылыга Валерий Николаев эттэ.
Тиэхиньикэлэр хоту сиргэ үлэлииргэ аналлаахтар, собуоттан гарантиялаахтар. Цистерналар истэрэ 4200-8000 л. Дьэбинирбэт ыстаалтан оҥоһуллубуттар. Эримиэннээхтэр, суһал ыҥырыыны оҥорор кнопкалаах, ГЛОНАСС систиэмэлээх. Массыыналар бу күннэргэ бастакы эриэйсэлэрин оҥоруохтара.
