Өрөспүүбүлүкэ дьаһалтата бу сылга “Бүлүү”, “Халыма” уонна “Лена” федеральнай суоллары суотабай сибээһинэн хааччыйыыга куоҥкурус ыытары былаанныыр. Ол уопсай устата 4 тыһ км тэҥнэһэр. Бу туһунан бырабыыталыстыба саайтыгар суруйаллар.
Сэттэ нэһилиэгинэн ааһар “Бүлүү” суол уопсай устата 1546 км. Саха сирин атын эрэгийиэннэри кытта ситимниир “Лена” ФАД М-56 устата 1157 км, онтон 889 км өрөспүүбүлүкэ иһинэн ааһар. Магадан уобалаһын кытта ситимниир “Халыма” суол устата 2021 км, 1187 км өрөспүүбүлүкэ иһинэн ааһар.
“2021 сыл түмүктэниэр диэри “Бүлүү”, “Халыма” уонна “Лена” федеральнай суолларга суотабай сибээс баар буолуоҕа. Куоҥкурус бу сыл бүтүүтэ ыытыллыахтаах”, – диэн иһитиннэриигэ суруйаллар.
СӨ инновацияҕа, сыыппаранан сайдыы миниистирэ Анатолий Семенов, суотабай сибээс араас саахал тахсар түгэнигэр олус наадалааҕын бэлиэтиир. Сибээс урут суох учаастактарыгар баар буолуоҕа диэн этэр.
Ону таһынан, Саха сирин уһук сытар сирдэригэр оптоволокно ситимигэр РТРС (Арассыыйатааҕы телевидение уонна радио ситимэ) башняларын холбуур бырагыраамма үлэлиэҕэ. Оператора “Ростелеком” буолар. Үлэ үс сыл устата ыытыллыа.
РТРС башнялара куттала суох буолууну хааччыйыыга көмө буолуохтарын сөп. “Холобур, башняларга баар телекамералар көмөтүнэн ойуур баһаарын кэтээн көрүөххэ сөп”, – диэн Анатолий Семенов этэр.
