Бүгүн Ил Түмэн дьокутаата,биллэр урбаанньыт, меценат Руслан Федотов тула сонун тилийэ көтөн кэбистэ. “Сахамедиа” биир саайта Руслан Федотовы “сиэн быраатын өлөрүүгэ кыттыгастааҕын билиммит, ону ааһан атын дойдуга күрээри сылдьыбытын тараччы тутан ылбыттар” диэн суруйбут. Онтон чомчу буолаат, “Сахамедиа” сүрүн саайта – ЯСИА — “дьокутаат туһунан сымыйа сурах” диэн билиннэ. Ити аата туохпутуй?
Хас да саайты үлэлэтэ олорор “Сахамедиа” ити быһыытынан уопсастыбаны араастаан долгута, аймыы олороро төһө сөптөөҕүй? Норуот итэҕэйэн, ытыктаан талан ылбыт киһитин онно-манна, буолаары буолан киһини өлөрүүгэ уорбалаан суруйара эрэдээксийэ бэлиитикэтэ буолла дуо? Били, аныгылыы “хайп” диэннэрэ судаарыстыба СМИтигэр туһаныллара төһө оруннааҕый?
Санатар буоллахха, бу дьыл кулун тутар 29 күнүгэр фейк сонуннары тарҕатыыга эппиэтинэс сүктэриллэрин туһунан саҥа сокуон киирэн турар. Путин былааһы уонна уопсастыбаны үөҕүү, холуннарыы иһин административнай эппиэтинэс сүктэриллэрин туһунан сокуоҥҥа илии баттаабыта. Ыстырааба – 30 тыһ. солк. саҕалаан балтараа мөлүйүөҥҥэ тиийэр. Маны таһынан, итинник дойҕохтор түргэнник сотторуллуохтаахтар.
“Якутия” хаһыат саайта – YakutiaDaily 2018 сыллаахха сэтинньи 29 күнүгэр Аммаҕа Руслан Федотов аймаҕын – Александры, үс мааскалаах киһи ытан өлөрбүт дьыалатыгар “сыбаабыт” уонна “тас дойдуга куотаары сырыттаҕына туттулубут” диэн суруйбута. Эбиитин “силиэстийэ салҕанар,ону кыраҕатык кэтээн көрөбүт” диэн буолбута. Онтон ЯСИА Руслан Федотов хонтуоратыгар үлэлии олорорун уонна ити дойҕох туос сымыйа буоларын туһунан суруйбута. Маны таһынан Силиэстийэлиир кэмитиэт официальнай кэмэнтээрийигэр сымыйа буоларын туһунан бигэргэммитин суруйбута.
