Бүгүн ЛДПР баартыйа дьокутааттара Госдуумаҕа Судаарыстыбаннай кэлим эксээмэни (ЕГЭ) утарар сокуон барылын киллэриэхтэрэ. Бу туһунан фракция пресс-сулууспата иһитиннэрэр.
Сокуон барылын быһаарыы суругар “СКЭни орто оскуоланы бүтэрээччилэргэ уонна үрдүк үөрэххэ туттарсааччыларга эксээмэн быһыытынан тутан бүтүөххэ. СКЭ оннугар орто оскуола уонна сүрүн уопсай оскуола биридимиэттэринэн судаарыстыбаннай эксээмэни киллэрэргэ”, -диэн этиллэр.
Сокуон барылын ааптардара бэлиэтииллэринэн, билигин үөрэнээччи бэйэтин кыаҕынан СКЭҕэ толору бэлэмнэнэр кыаҕа суох. Манна хайаан да эбии репетитордары эҥин ылан бэлэмнэниэххэ наада. Оттон төрөппүт барыта ыарахан сыаналаах репетитор өҥөтүн төлүүр кыаҕа суох.
Бу сокуон барыла олоххо киирэр түгэнигэр, “үрдүк үөрэххэ туттарсааччылар дьиҥнээх таһымнара көстүөҕэ. Билиҥҥи курдук кырдьыга-сымыйата биллибэт СКЭ түмүгэ улахан саарбахтааһыны үөскэтэр. Судаарыстыбаннай эксээмэнинэн туттарсан киирбит оҕо чахчы таһымнаах буолара саарбахтаныа суоҕа”.
