Сэтинньи 15 күнүгэр Дьокуускай куоракка Профсойуустар дьиэлэригэр, “О предоставлении мер социальной поддержки молодым журналистам редакций районных средств массовой информации Республики Саха (Якутия)” диэн сокуон бырайыагын уопсастыбаннай истиитэ буолан ааста. Дьүүллэһиигэ бырайыагын көҕүлээччи, Ил Түмэн дьокутаата, “Ситим” медиа-бөлөх генеральнай дириэктэрэ Мария Христофорова, СӨ Уопсастыбаннай палаататын экологияҕа, экологическай сайдыыга уонна ОДьКХ хамыыһыйатын бэрэссэдээтэлэ Николай Барамыгин, саха көрдөрөр-иһитиннэрэр эйгэтин бэрэстэбиитэллэрэ уонна филологическай факультет устудьуоннара кыттыыны ыллылар.
Сокуон бырайыагын туһунан сиһилии Мария Христофорова маннык кэпсээтэ:
– Бүгүҥҥү тэрээһиҥҥэ устудьуоннар кыттыыны ылаллара олус кэрэхсэбиллээх. Тоҕо диэтэххэ, бу көҕүлээһин бастакынан кинилэргэ ананнар. Аны биир-икки сылынан ситэн-хотон олоххо киириэ дии саныыбын.
“Тыа сиригэр эдэр исписэлиис” диэн бырагыраамма баарын туһунан эттигит. Бу бырагырааммаҕа суруналыыстар киирбэттэр. Дьиҥэр, учууталлары, быраастары, инженердэри уо.д.а. исписэлиистэри кытта тэҥҥэ киллэриэххэ баар этэ. Дойду бэрэсидьиэнин ыйааҕынан култуура үлэһиттэрин хамнаһа индексацияламмыта. Манна суруналыыстар киирэллэр эрээри, үбүлээһиҥҥэ хапсыбаттар. Оннооҕор бибилэтиэкэ худуоһунньуга улуустааҕы хаһыат сүрүннүүр эрэдээктэриттэн үрдүк хамнаһы ылар. Муниципалитет исписэлииһэ хас да үлэни оҥорор. Ол курдук, суруналыыстыыр, корректордыыр, SMM эйгэтигэр үлэлиир, администратордыыр. Ону таһынан, версткалыыр, хаартыскаҕа, видеоҕа устар. Уонна үлэһээччи, дьаһалта, эрэдээктэр баҕаларын толоруохтаах, ыйыллыбыт болдьоххо хаачыстыбалаах матырыйаалы туттарыахтаах. Билигин эрэдээксийэлэргэ суруналыыс үөрэҕэ суох дьон үлэлииллэр. Тыл үөрэхтээхтэрэ эрэ буолбакка, историк, физик, экэнэмиис, инженер уо.д.а. идэлээх дьон үлэлииллэр.
Биһиги бу көҕүлээһининэн эдэр суруналыыстар өйөбүл ыллалларын туруорсабыт. Бу бырагыраамма чэрчитинэн квалификацияларын үрдэппит уонна оройуоҥҥа эрэ баран үлэлээччилэр буолбакка, номнуо үлэлии сылдьар суруналыыстар эмиэ киириэхтэрин сөп.
Муниципальнай хаһыаттар “Сахабэчээт” биэдэмистибэтигэр киирэн эрэллэрэ кыһалҕаны уустугурдар. Бу эрэдээктэрдэри олус долгутар. Билигин эрэдээксийэ бүддьүөтэ сибээс министиэристибэтин субсидиятыттан уонна бүддьүөт таһынан көрүллэр үптэн тыырыллар. Эрэдээксийэлэр эрэкэлээмэ биэрээччилэри көрдүүллэр. Манна биллэн турар эдэр, эрчимнээх, көхтөөх суруналыыстар наадалар. Кинилэр социальнай ситимнэр нөҥүө эрэдээксийэ таһаарыыларын тарҕатар, саайтары үлэлэтэр буолуохтаахтар. Сотору кэминэн Интэриниэт СМИ бэчээти үтүрүйүө. Ол иһин, биһиги көҕүлээһиммит суруналыыс идэтигэр үөрэнэр ыччакка туһаайыллар.
