Бу күннэргэ бүтүн өрөспүүбүлүкэни үөрүүлээх сонун тилийэ көппүтэ. Ол курдук, Өлүөнэ өрүһү туоруур күргэ тутуутун дойду бэрэсидьиэнэ Владимир Путин өйөөбүтэ. Оттон Ил Дархан Айсен Николаев күргэ кэлэр сылтан тутуллан 2025 сылга диэри үлэҕэ киирэригэр эрэллээҕин эттэ.
Айсен Сергеевич бу соторутааҕыта Владимир Путины кытта көрсөн, күргэни тутуу хаамыытын туһунан кэпсэппитэ. “Бу биһиги өрөспүүбүлүкэбитигэр эрэ буолбакка, бүтүн дойдуга олус наадалаах бырайыак. Ону, олоххо киллэриигэ биһиэхэ улахан эппиэтинэс сүктэриллэр. Билигин өрөспүүбүлүкэҕэ төгүрүк сыл устата сырыы суоҕа эрэгийэн социальнай-экэнэмиичэскэй сайдыытын атахтыыр. Күргэ өрөспүүбүлүкэ киинигэр эрэ буолбакка, Саха сирин арҕаа сытар оройуоннарыгар олус наадалаах”, – диэн Ил Дархан иһитиннэрдэ.
Кини этэринэн күргэ “Лена”, “Халыма” уонна “Бүлүү” федеральнай суоллары ситимниир кыахтаах. Бүлүү уонна Алдан өрүстэргэ күргэ тутулуннаҕына, Мииринэйтэн Иркутскай уобаласка диэри сырыы баар буолар. “Саха сирин бары олохтоохторун ыра санаата кэлэр 2020 сылтан тутуллан, 2025 сылга үлэҕэ киирэригэр дойду бырабыыталыстыбата түмүктүүр быһаарыныыны ылыныаҕа диэммин эрэнэбин”, – диэн Айсен Николаев эттэ.
