Кэбээйи бибилэтиэкэтэ улууска IT-киининэн буолуоҕа, Сайылыкка дьэ, оҕо уһуйаана тутуллуоҕа, оттон Ньидьили эбэҕэ билим үлэлэрэ ыытыллыаҕа. Бу туһунан премьер Владимир Солодов Кэбээйи улууһугар сырыытын кэмигэр кэпсээтэ.
Владимир Солодов бу сырыытын Тимофей Сметанин 100 сыллаах үбүлүөйүн кытары сибээстиир. Кини улууска сылдьан социальнай-экэнэмиичэскэй туругун кытары билистэ. Олохтоохтору кытары көрсүһүүгэ кэбээйилэр бырабыыталыстыба чилиэттэригэр уонна нэһилиэк баһылыктарыгар тирээн турар кыһалҕаларын кэпсээтилэр. Кэбээйилэр ордук кырыы нэһилиэктэргэ суол-иис мөлтөҕүн уонна интэриниэт олус бытаанын эттилэр.
Владимир Солодов сыл бүтүөр дылы Сайылыкка кэтэһиилээх уһуйаан тутуутугар сири атыылаһыахтарын эттэ. Маны таһынан Кэбээйи сэлиэнньэтигэр опто-волокно сибээһи тургутан көрдүлэр. Билиҥҥитэ оскуолаҕа түргэн тэтимнээх интэриниэт номнуо киирбит. Сотору кэминэн Кэбээйи-Дьокуускай хайысханан сыл устата суоллаах буолуохтара.
Экология боппуруоһун эмиэ дьүүллэстилэр. Премьер этэринэн, улууска экология куттала суоһаабатын кэтээн көрөр буолуохтара, оттон наада буоллаҕына, нэһилиэктэри ыраас уунан хааччыйар бырагыраамаҕа киллэриэхтэрэ. Маны таһынан, Ньидьили эбэҕэ билим чинчийиилэрэ ыытыллыахтара уонна уу таһыма тоҕо түһэрин быһааран, ону туоратарга үлэ ыытыллыаҕа.
Маны таһынан, Кэбээйи бибилэтиэкэтигэр улууска IT-киин арыллыаҕа, онно ким баҕалаах информационнай технологиялары баһылыырга дьарыктаныахтара. Маны таһынан, улууска бырамыысалыннас сайдыытын тула кэпсэттилэр.
