Бүгүн, ахсынньы 5 күнүгэр Чурапчы улууһугар Ил Дархан Айсен Николаев, Чурапчы нэһилиэгин Куоҕалы түөлбэтэ гааска холбонор үөрүүлээх тэрээһинигэр ыалдьыттаата.
Бу түөлбэҕэ 2,5 тыһ киһи олорор. Манна “Туллукчаан”, “Березка” уһуйааннар, Чурапчытааҕы гимназия, кэллиэс, “Чурапчы” тыа хаһаайыстыбатын кэпэрэтиибэ, маҕаһыыннар бааллар. Хаарбах дьиэлэртэн көһөрүү бырагыраамманан түөрт элбэх кыбартыыралаах таас дьиэлэр тутуллубуттар. Билигин манна 200-чэ ыал олорор.
“Мантан инньэ эһиги дьиэҕит куруук сылаас буоллун. Егор Борисов саҕалаабыт илин эҥэр улуустарыгар гааһы киллэрии бырагыраамма кэлиҥҥи сылларга олоххо киирэр. Күөх төлөн номнуо Чурапчыга кэллэ. Былааннаммыт 12 учаастактан 5-с киирдэ. Эһиэхэ өссө тэтимнээх сайдыыны баҕарабын”, – диэн Ил Дархан олохтоохтору эҕэрдэлээтэ.
“Маннык үөрүүлээх күннэр өрөспүүлүкэҕэ сотору-сотору буолаллар. Холобур, саҥа оскуолалар, уһуйааннар, балыыһалар, суол-иис үлэҕэ киирэллэр. Бу соторутааҕыта Марха өрүһү туоруур күргэ арылынна. Бу – өрөспүүбүлүкэ дьаһалтата ыытар бэлиитикэтин сүрүн тутула”, – диэн Егор Борисов биир дойдулаахтарыгар эҕэрдэ тылын эттэ.
Үөрүүлээх тэрээһин кэнниттэн Ил Дархан элбэх оҕолоох Филипповтар дьиэ кэргэҥҥэ ыалдьыттаата.
