Чурапчыга хаарбах туруктаах дьиэлэртэн көһөрүү бырагыраамманан, 122 киһи Ярославскай аатынан уулусса 26/1 дьиэтигэр толору хааччыллыылаах саҥа кыбартыыраларга көһүөхтэрэ.
“Биһиги “СахаСтройГрупп” тэрилтэбит быйыл уон сыллаах үбүлүөйүн бэлиэтиир. Бу сыллар тухары Чурапчыбыт улууһа сайдарын туһугар үлэлээн-хамнаан кэллибит. Биһиги бу кыбаарталга улааппыппыт, манна эдэр сааспыт ааспыта. Инникитин өссө хас да биэс этээстээх дьиэлэри тутар былааннаахпыт. Бу дьиэни олус кыһаллан туттубут, онон олохтоохтор дьиэҕитин харыстыыргытыгар баҕарабын”, – диэн “СахаСтройГрупп” ХЭУо генеральнай бэдэрээтчитэ Дмитрий Ефимов эттэ уонна бэлиэ күлүүһү нэһилиэк баһылыгар Владимир Сивцевка туттарда.
Оттон олохтоохтор ааттарыттан Ирина Петрова махтал тылын эттэ: “Бүгүн биһиэхэ ураты күн тосхойдо. Ол курдук, саҥа дьиэбит күлүүһүн туттубут. Урукку дьиэбин миэхэ таһаарыылаах үлэм иһин бэлэхтээбиттэрэ. Оттон бу саҥа дьиэбин судаарыстыбаттан ыллым. Онон олус үөрэн, дьоллонон турабын. Төрөөбүт улууһум биһиги үлэбитин сыаналыырыгар махтанабын”.
