Ааспыт өрөбүллэргэ “Алмаастаах түөлбэ – 2019” дьаарбаҥка ыытыллан, Мииринэй олохтоохторо күннээтибит. Бу тэрээhин Саха сирин тыатын хаhаайыстыбатын министиэристибэтин, “Ситим” медиа-бөлөх, Мииринэй улууһун дьаһалтатын, мээрийэ, “Биир ньыгыл Арассыыйа” баартыйа тэрийиилэринэн сылын ахсын ыытыллар.
“Алмаастаах түөлбэ – 2019” дьаарбаҥка бу да сырыыга сүрдээх көхтөөтүк ыытылынна диир оруннаах. Атыы-тутуу тигинэччи барда. Дьокуускайтан “Северное сияние” пиирмэ, Бүлүүттэн “Сыа Бүлүү” ТХПК, Үөһээ Бүлүүттэн Олимпиада Григорьева чааһынай тэрилтэтэ, Сунтаартан Уһун Күөллээҕи агро-оскуола, “Тирэх” пиирмэ, “Хочо”, “Yрдэл” ТХПК-лар кытыннылар. Таһырдьааҥҥы эрээттэртэн саҕалаан кытархай лоһуор собо, эт эгэлгэтэ, балык – киһи талбыта барыта баара. Мииринэй олохтоохторо Үөһээ Бүлүүттэн Олимпиада Григорьева аҕалбыт ынаҕын уонна сылгытын этигэр чуо тиийдилэр. Бөдүргэй, баччах, амынньыар, тараһа, хайыы-үйэ эрбэнэн, сааһыланан сыталлара көрөргө үчүгэйэ сүрдээх этэ. Эмис убаһа нөмөйө, күөнэ, түөс көмүрүөтэ эмиэ эрбэнэн, олус кичээҥитик сууланан аҕалыллыбыттар. Тоҕоруһуу, тоҥонохтоһуу үөскүү сырытта. “Миэхэ да миэхэ”, “Тыый, уочараты тутуһуҥ” дэһии буолла. Биир, икки, биэс тыһыынчалаах күпүүрэлэр элэҥнээтилэр.
Сыалаах эти куулунан состулар, үрүксээк муҥунан, бэрэмэдэй сиигинэн тэллэстэринэн симиннилэр. Ахсыс павильоҥҥа ойоҕос тостор уочарата буолла. Дьону “Сыа Бүлүү” тэрилтэ үп-үрүҥ, сып-сымнаҕас сыыра, суораттара, иэдьэгэйдэрэ, 3% сыалаах бакыаттаах үүттэрэ сэргэҕэлэттилэр. Сунтаар улууһун хаһаайыстыбалара чөчөгөй, ис, симии харта, быар аҕалбыттар.
Мииринэйгэ Клемец хаһаайыстыба индейкэ көтөрдөрү хаһыс да сылын ииппиттэр. Бу индейкэлэрэ бадаҕа бор көтөр буолан үллэччи уойар эбит. Онон, Саха сиригэр индейкэни иитиэххэ сөп эбит дии санаатым. Дьэ ити курдук, “Алмаастаах түөлбэ – 2019” дьаарбаҥка талыы-талба аһы, мииринэйдэргэ анаан тилэри тарта. Атыы-тутуу да дьоһун, харчы да хамнаата. Норуот олохтоох тыа хаһаайыстыбатын бородууксуйатын бэркэ диэн сөбүлээн атыыласта. Сараабыкка дылы буоллубут. Омоллоон олоҕо, Дьэргэстэй ыһыаҕа тосхойдо. Махтал тэрийээччилэргэ!
Станислав Алексеев, Мииринэй куората. Ааптар хаартыскалара.
