Ахсынньы 14 күнүгэр Мэҥэ Хаҥалас улууһун Тарат нэһилиэгэр гаас киирбит. Бу туһунан Ил Түмэн пресс-сулууспата иһитиннэрэр.
Тарат нэһилиэгэр 365 киһи олорор, олортон 104 оҕо. Нэһилиэккэ биэлсэр пууна, оскуола, уһуйаан, култуура дьиэтэ баар.
Гаас эбийиэгин уопсай суумата 52 мөл солк тэҥнэһэр. Бастаан бөһүөлэк иһигэр гаас ситимэ тардыллыбыт. Ол курдук, 29 чааһынай дьиэ, Р.И. Цыпандин аатынан култуура дьиэтэ уонна олорор дьиэлэргэ 92 гаас турбата тардыллыбыт. Инникитин Совхознай, Лесная, Нагорнай уулуссалар уонна “Ровесник” диэн ыччат кыбаарталыгар гаас киирэрэ былааннанар. Үлэ түмүктүүр түһүмэҕэ олоххо киирэригэр 11 мөл солк үп ирдэнэр. СӨ бырамыысалынас уонна геология министиэристибэтэ иһитиннэрэринэн, 2020 сылга үбүлээһин көрүллэр кыахтаах.
2018-2022 сылларга Саха сиригэр 10 нэһилиэнньэлээх пуун гааска холбоноро былааннанар. Ол курдук, Чурапчыга түөрт нэһилиэк, Мэҥэ Хаҥаласка уонна Ленскэй оройуонугар иккилии, Горнай улууһугар биир нэһилиэк, ону таһынан, Өлүөхүмэ куората.
290,2 км гаас ситимин тардыыга, 272 км саҥалыы уларытан оҥорууга уонна тутууга, 5705 чааһынай дьиэҕэ гааһы киллэриигэ 1,137 млрд солк үп көрүллүбүт.
Айылҕа гааһа уон улуус 100 нэһилиэнньэлээх пуунугар туттуллар: Үөһээ Бүлүүгэ, Бүлүүгэ, Горнайга, Кэбээйигэ, Намҥа, Хаҥаласка, Мэҥэ Хаҥаласка, Чурапчыга, Мииринэйгэ, Ленскэйгэ, ону таһынан, Дьокуускайга. Гаастааһын таһыма 32,53 %, ол иһигэр тыа сирэ — 21,54 %.
