Антонида Барашкова бэрэссэдээтэллээх Сунтаардааҕы “Тирэх” кэпэрэтиип оҥорон таһаарар бородууксуйата “eBay” Интэриниэт маҕаһыыҥҥа атыыланар буолла.
Ол курдук, отонтон оҥоһуллубут сироптары уонна барыанньалары номнуо АХШ-га, Италияҕа, Норвегияҕа, Англияҕа, Сингапурга ыыппыттар.
Салайааччы Антонида Барашкова кэпэрэтиип үлэтин уонна инники былааннар туһунан маннык кэпсиир: “Биһиги отонтон, хаптаҕастан, моонньоҕонтон, сугунтан сироптары, барыанньалары оҥоробут. Туох да эбии консерваннары, өҥ, амтан биэрэр эбиликтэри туһаммаппыт. Отон уонна саахар эрэ туттуллар. Сир аһа экология өттүнэн ыраас сиргэ үүнэр. Билигин Аан дойду үрдүнэн дьон ордук экологическай ыраас бородууксуйалары сиир буолла. Онон, өрөспүүбүлүкэҕэ оҥоһуллар табаардар аан дойдутааҕы ирдэбилгэ толору эппиэттииллэр. Мин тыа хаһаайыстыбатын инженерэ идэлээхпин. Үөрэхпин бүтэрэн баран учууталынан, тыа хаһаайыстыбатын тэрилтэлэригэр үлэлээбитим. Биэнсийэҕэ тахсан бараммын сир аһынан оҥорон таһаарар кэпэрэтиип тэрийэр туһунан санаа киирбитэ. Билигин кэпэрэтиипкэ 20 тахса киһи үлэлиир. Биир үтүө күн “portal.b14.ru” саайт нөҥүө “Мой бизнес” киин туһунан билбитим. Онтон ыла үлэбитигэр улахан уларыйыылар киирдилэр диэххэ наада. Биһигини Харбин куоракка ыытыллыбыт “Экспо-2019” норуоттар икки ардыларынааҕы быыстапкаҕа барарга сүбэлээбиттэрэ. Онно биһиги бородууксуйабыт улахан интэриэстээҕин билбиппит. Бу сырыыттан Аан дойду ырыынагар көхтөөхтүк үлэлээн барбыппыт”.
“eBay” саайтка саха бородууксуйата нобуорунан атыыланар. Ол курдук, 4 сироп уонна 6 бааҥка барыанньа нобуорун сыаната 57 $. Бу сыанаҕа илдьэн биэриитэ эмиэ киирэр. Оттон Саха сиригэр Сунтаарга, Ньурбаҕа уонна Мииринэйгэ атыыланар. Салайааччы Антонида Барашкова кэпсииринэн инникитин “Alibaba.com” саайт нөҥүө атыылыыр былааннаахтар.
