Бүгүн, СӨ Судаарыстыбаннай мунньаҕын дьокутаата, «Ил Түмэн» бэчээт кыһатын генеральнай дириэктэрэ, парламент хаһыатын кылаабынай эрэдээктэрэ Мария Христофорова улуус, Сунтаар нэһилиэгин дьокутааттарын, оскуола дириэктэрдэрин, уопсастыбанньыктары кытта көрүстэ. Оройуон Сэбиэтэ уонна «Ил Түмэн» бэчээт кыһата бииргэ үлэлиир туһунан, ыытыллар үлэни-хамнаһы сырдатыыга сөбүлэһии түһэристилэр.
Көрсүһүү саҕаланыыта Мария Николаевна быйыл Улуу Кыайыы 75 сыллаах үбүлүөйүн көрсө, бэчээт кыһата «Саха сирэ умнубат 1941-1945» («Якутия помнит 1941-1945») диэн анал бырайыагы аһан, олунньуттан үлэлэтэн барарын туһунан эттэ.
Бырайыак сүнньэ туохханый? Sakhaparliament.ru саайтыгар норуот электроннай кинигэтин көрүҥүнэн сэриигэ кыттыбыт саллааттар, тыыл үлэһиттэрин, сэрии огдооболорун, тулаайахтарын уонна оҕолорун тустарынан сибидиэнньэлэр мунньуллуохтара. Били, «Өйдөбүнньүк» («Память») кинигэ курдук. Ол эрэн, электроннай көрүҥэ.
Тустаах бырайыак туһунан кинилэр Уус Алдан, Мэҥэ Хаҥалас улуустарыгар, Мииринэй оройуонугар уонна М.К.Аммосов аатынан Хотугулуу-Илиҥҥи федеральнай университекка билиһиннэрбиттэр. Барытыгар сэҥээриини ылбыттар.
Бырайыак, бастатан туран, эдэр дьоҥҥо туһуланар. Кинилэр дойдуларын устуоруйатын билэллэригэр. Эһэлээх, эбэлэрэ хайдахтаах курдук ыарахан олоҕу ааспыттарын билэн, кинилэргэ сүгүрүйэ үөрэнэллэригэр ананар.
Мария Христофорова Ил Түмэҥҥэ үс кэмитиэккэ (доруобуйа харыстабыла, социальнай көмүскэл, үлэлээх буолуу; тыа хаһаайыстыбатын бэлиитикэтэ; наука, үөрэҕирии, култуура, СМИ, уопсастыбаннай холбоһуктар) үлэлиир. Онно ыытар үлэтин-хамнаһын туһунан билиһиннэрдэ. Кини саамай сытыы боппуруостар билигин доруобуйа харыстабылын салаатыгар тураллар диэтэ. Өрөспүүбүлүкэ үрдүнэн 700 эмп үлэһитэ сарбыйыыга түбэһиэхтэрин сөп эбит. Итинтэн 109 үлэһит аҥардас Сунтаартан. Ону таһаарбат туһуттан билигин үлэ барар диэтэ дьокутаат. Ол эрэн, балаһыанньа ыараханын билиннэ.
Улуус бэтэрээннэрин сэбиэтин бэрэссэдээтэлэ Афанасий Васильев Ил Түмэн ааспыт сылга ылыммыт сэрии оҕолорун туһунан сокуона ситэтэ суоҕун туһунан эттэ. Ону чопчулаан, сааһылаан биэрэргит буоллар диэн бэйэтин санаатын эттэ.
Оройуон Сэбиэтин дьокутаата Мария Спиридонова Бордоҥҥо саҥа култуурунай киин дьиэтин тутуу туһунан санаатта. Инвестиционнай бүддьүөт үбэ сарбыллан, үгүс эбийиэк тутуута тохтуох курдук. Онон балаһыанньаттан тахсар суолу тобулар туһунан толкуйдуохха наадата ыйылынна.
Көрсүһүү түмүгэр оройуон Сэбиэтэ (бэрэссэдээтэл Ульяна Попова) уонна «Ил Түмэн» бэчээт кыһатын (генеральнай дириэктэр Мария Христофорова) бииргэ үлэлиир туһунан, ыытыллар үлэни-хамнаһы сырдатыыга сөбүлэһии түһэристилэр.
Гаврил АНДРЕЕВ, ulus.media/
