2019 сылга Өлөөн улууһугар таба ахсаанын элбэтиигэ былаан 103 бырыһыан туолбут. Инньэ гынан, 271 төбөннөн эбиллибит. Бу туһунан бырабыыталыстыба уонна Ил Дархан дьаһалтатын пресс-сулууспата иһитиннэрэр.
Бэҕэһээҥҥиттэн улууска үгэс буолбут бырабыыталыстыба отчуота саҕаламмыт. Отчуоттуур бөлөҕү вице-премьер Алексей Колодезников салайар. Кини этэринэн,улууска дьиэ табатын ахсаана биллэ улааппыт. Билигин улууска 5287 төбө баар, ол иһигэр тугут ахсаана 2434 төбө. 2018 сылга улууска 5016 таба баара. Күн бүгүн Өлөөн ыстаадаларыгар 64 киһи үлэлиир. Былырыын кинилэр наадаларыгар диэн 14 “Сокол” бурааннары атыыласпыттар уонна табаһыт хамнаһын 40 тыһ. солк.дылы үрдэппиттэр.
