Ытык- мааны биир дойдулаахтарбыт!

Хайдах, хайа өттүнэн биһиэхэ дьайыахтара биллибэт уустук, сүдү уларыйыылар аан дойду үрдүнэн бара турар кэмнэригэр олоробут. Биири отой дьэҥкэтик өйдүөх тустаахпыт – урукку курдук олорон хааларбыт хайдах да сатамматын, буола турар уларыйыыларга өй- санаа өттүнэн ситэри бэлэмэ суох көрсөн эрэрбитин. Баччааҥҥа диэри илдьэ кэлбит олох сорох өрүттэригэр сыһыаммытын тосту уларытыахпытын наада, бастатан туран, арыгыга уонна табахха сыһыаммытын. Ону кэм- кэрдии, олох- дьаһах бэйэтэ күүскэ ирдиир.

Кэлиҥҥи сылларга былаас өттүттэн ылыныллыбыт арыгы атыытын хааччахтыыр сокуоннар үчүгэй өттүнэн дьайбыттара мэлдьэһиллибэт. Ол гынан баран, арыгылааһын билигин да саха омугар отой кыайтара илик улахан кыһалҕа буолар. Омук өйүгэр-санаатыгар, эт-хаан өттүнэн туругар арыгыттан итэҕэһэ суох алдьатыылаах дьайыылаах мөкү дьарыгынан табахтааһын буолар. Саба быраҕан көрдөххө, нэһилиэнньэ үс гыммыт биирэ табахтыыр курдук, аҥаара буолбатах буоллаҕына. Оннук киэҥник тарҕаммыт, дьоҥҥо-сэргэҕэ дириҥник иҥпит мөкү дьарыгынан буолар, табахтааһын диэн. Санаан көрүҥ эрэ, табах биир паачкатын сыаната 120 солкуобай. Табахсыт кырата күҥҥэ биир паачка табаҕы тардар. Арай онно ойоҕо дуу, эрэ дуу эмиэ тардыһар буоллун! Онно эһээлэрэ дуу, эбээлэрэ дуу эбилиннин! Биир киһи ыйга 3.600 солкуобайы, сылга 43.200 солкуобайы буруо гынан эҕирийэр. Ыалга үс киһи табахтыыр буоллаҕына 43.200 солк. х 3 = 129.600 солкуобай үп сыл устата күдэҥҥэ көтөр! Ону санааҥ!

Арыгылааһыны утары үлэни сэргэ табахтааһыны утары үлэни күүскэ ыытыахха наада. Биһиги санаабытыгар, арыгылааһынтан олоччу босхолонуохпут иннигэр табааҕы урут кыайыахпытын сөп. Ол туһуттан, биһиги, Үөһээ Бүлүү улууһун Боотулуу нэһилиэгин олохтоохторо, ыҥырыы таһаарабыт: 2020 сыл олунньу уонна кулун тутар ыйдарыгар табаҕы утары үлэни күүскэ ыытарга! Бу кэм устатыгар табаҕы букатыннаахтык быраҕарга хас биирдии табахсыт бэйэтигэр сорук туруорунуохтаах уонна ону толорор туһугар туох баар өйүн-санаатын, күүһүн-уоҕун, санаатын түмүөхтээх, кэпсээҥҥэ сылдьар улуу өһөспүтүн киллэриэхтээх!

Арыгы, табах  кулута буолан бүтүөҕүҥ! Табахтан, арыгыттан босхоломмут көҥүл сахалар буолуоҕуҥ! Нэһилиэкпитигэр баар үлэ тэрилтэлэригэр барыларыгар тохсунньу- олунньу ыйдарга мунньахтаан, үлэһиттэр 100 % куоластаан бу ыҥырыы ылыныллыбыта уонна бүтэһигэр, олунньу 4 күнүгэр, Аан дойдутааҕыа искэн ыарыыны кытта охсуһуу күнүгэр дьаһалта исписэлиистэрэ, дьокутааттара, тэрилтэлэр, түөлбэлэр салайааччылара, уопсастыбанньыктар кыттыылаах мунньахха бу ыҥырыы бигэргэннэ. Муус устарга ааҕынан көрүөхпүт, төһө киһи табаҕын бырахпытын. Арай, биир да саха табах диэни тарпата, арыгы диэни испэтэ буоллар, туохха барытыгар дьоҕурдаах, өйдөөх, күүстээх омук быһыытынан, сахалар тута сайдыы, өй- санаа, ситиһии өттүнэн Арассыыйа бары омуктарын инники күөнүгэр тахсыа этибит. Онно саарбахтааһын суох. Киһи буолан килбэйиэҕиҥ, саха буолан сандаарыаҕыҥ!

 Үөһээ Бүлүү улууһун Боотулуу нэһилиэгин олохтоохторо.