Саха сиригэр булуллубут бөдөҥ алмаас Сэбиэскэй Сойуус Геройа Клавдий Краснояров аатын ылла. Бу туһунан Ил Дархан уонна бырабыыталыстыба пресс-сулууспата иһитиннэрэр.
Саһархай өҥ эгэлгэлээх, курдары көстөр кырыы формалаах кытаанах эттиктээх, 59,49 карат ыйааһыннаах сэдэх алмааһы “Юбилейнай” туруупкаттан булбуттара.
2020 сылга АЛРОСА хампаанньа өрөспүүбүлүкэҕэ хостообут алмаас таастарга Саха сириттэн Аҕа Дойду Улуу сэриититтэн ыҥырыллан барбыт Сэбиэскэй Сойуус Геройдарын аатын иҥэрэр. Бу иннинэ бөдөҥ алмаастарга Сергей Асямов, Семен Достовалов, Максим Жадейкин уонна Михаил Космачев курдук дьоруойдар ааттара күлүмүрдэс тааска иҥэриллибиттэрэ.
