Арассыыйа Бэрэсидьиэнэ Владимир Путин Кемерово куоракка “Зимняя вишня” атыы-эргиэн киинигэр буолбут, 60-тан тахса киһи өлбүт баһаар биричиинэтин туһунан эттэ.
“Бу буолбут быһылаан сэрии кэмигэр дуу, шахтаҕа соһуччу метан тоҕо барбытыттан дуу буолбата. Дьон оҕолорун кытары сынньана кэлбиттэрэ ээ. Биһиги наар демографияны тупсарыахха диибит да, эйэлээх кэмҥэ бу үлүгэр киһини сүтэрдэхпит. Тоҕо маннык буолла? Дьон дьалаҕайыттан, кыһаллымтыата суох быһыыттан таҕыста”, — диэн Кемерова куоракка баһаар содулун тохтотор мунньахха эттэ.
Дойду баһылыга Силиэстийэлиир кэмитиэт салайааччытыгар Александр Бастрыкиҥҥа быһылааны таһаарбыт дуоһунастаах дьону эппиэккэ тардалларыгар эттэ. “Харчыта суох ыспыраапканы кыайан ылбаккын, оттон харчы иһин туохха барытыгар илии баттыыллар” , — диэтэ.
Бастрыкин силиэстийэ чэрчитинэн олус элбэх докумуон былдьаммытын туһунан эттэ. Кини мунньаҕы саҕалыырыгар өлбүттээхтэргэ дириҥ кутурҕанын биллэрдэ.
Бүгүн сарсыарда Путин Кемеровоҕа көтөн кэлбитэ уонна тута умайбыт атыы-эргиэн дьиэтигэр тиийбитэ. Онно мемориалга сибэкки дьөрбөтүн уурбута. Сибиир федеральнай уокуругар бэрэсидьиэн боломуочуйалаах бэрэстэбиитэлэ Сергей Меняйлолыын умайбыт дьиэни көрдүлэр.
Кемерово куоракка түөрт этээстээх атыы-эргиэн киинэ баскыһыанньаҕа умайбыта. Баһаарга 64 киһи суорума суолланна, ол иһигэр аччаабыта 8 оҕо. Балыыһаҕа 13 эчэйбит киһи сытар. Үгүстэрэ буруоҕа тумнастыбыттар.
