Киир

Киир

Иһитиннэрбиппит курдук, Өрөспүүбүлүкэ күнүн көрсө, Нам сэлиэнньэтигэр Култуура уонна духуобунай сайдыы Дыбарыаһын маҥнайгы сыбаайата түспүтэ. Бу эбийиэги АЛРОСА Саха сиринээги “Үүнэр көлүөнэ пуондатыгар” сыллата көмөлөһөн ыытар үбүнэн тутуохтара. Дыбарыас тутуута 450 мөл. солк. сыаналанар.

Ил Дархан Айсен Николаев ыйыытынан, Үүнэр көлүөнэ пуондата М.К.Аммосов төрөөбүтэ 125 сылын көрсө, итиэннэ тыын суолталаах социальнай эбийиэктэри тутуу былааныгар тирэҕирэн олоххо киллэрэллэр. Нам улууһун баһылыга Юрий Слепцов биир дойдулаахтарын аатыттан  өрөспүүбүлүкэ баһылыгар Айсен Сергеевич Николаевка, АЛРОСА хампаанньаҕа, генеральнай дириэктэр Сергей Ивановка уонна бырайыагы олоххо киллэрэ сылдьааччыларга махталын биллэрдэ. Улуус баһылыга хампаанньа өссө 2010 сыллаахха Нам улууһа сааскы халааҥҥа улаханнык эмсэҕэлээбитигэр биир бастакынан сөргүтүү үлэтигэр үбү-харчыны тыыран көмөлөспүтүн аҕынна. Оччолорго хампаанньа көмөтүнэн 10 олорор дьиэ, Граф Биэрэгэр киирэр суол күргэтэ тутуллубута. Нэһилиэнньэ хампаанньа ити сүҥкэн кылаатын үтүө тылынан ахтарын тоһоҕолоото уонна Граф Биэрэгэр хампаанньа туппут кыбаарталын олохтоохтор ис сүрэхтэриттэн махтанан туран, “АЛРОСА кыбаартала” диэн ааттаабыттарын бэлиэтээтэ.

Ити сыл, “АЛРОСА-Ньурба” хампаанньа биллэр судаарыстыбаннай уонна бэлитиичэскэй диэйэтэл Илья Егорович Винокуров аатын сүгэр Хатыҥ Арыытааҕы устуоруйа уонна кыраайы үөрэтэр түмэл саҥа дьиэтин тутан биэрбитэ. Онон, быйыл эмиэ Өрөспүүбүлүкэ күнүн баттаһа Нам улууһун олохтоохторугар улууска култуура уонна духуобунай сайдыы тирэҕэ буолуохтаах саҥа эбийиэк сыбаайата түспүтэ ураты суолталанна.

Эбийиэги “РДР Групп” ХЭУо тутуу хампаанньата дьэндэтиэҕэ. Саҥа тутуу бастакы сыбаайатын өссө ааспыт үйэҕэ тутуллубут, номнуо самныбыт дьиэ оннугар түһэрдилэр. Онон, аны икки сылынан Нам сэлиэнньэтигэр үс этээстээх, уопсайа 5 692 кв. м. иэннээх култуура Дыбарыаһа дьэндэйиэҕэ. Онно аныгылыы 400 миэстэлээх көрөр саала уонна икки бибилэтиэкэ баар буолуоҕа.

b9d87c3e ee77 4f83 83ca bead724e0037

Былаан быһыытынан, саҥа тутуу 2022 сыл үһүс кыбаарталыгар үлэҕэ киириэҕэ уонна намнар киэн туттар биир дойдулаахтара, саха норуотун уьулуччулаах уола, аатырбыт бэлитиичэскэй уонна судаарыстыбаннай диэйэтэл Максим Аммосов тереебутэ 125 сылын керсе уонна Саха АССР тэриллибитэ 100 сыллаах үбүлүөйдэрин баттаһа улуус олохтоохторугар эрэ буолбакка, өрөспүүбүлүкэ дьонугар-сэргэтигэр дьоһун бэлэх буолуоҕа.

Яна БАЙГОЖАЕВА

Тарҕат:

Санааҕын суруй