Бу күннэргэ Саха сиригэр Франция биллэр мусукаана, бэйиэтэ, суруйааччыта, Францияҕа Саха сириттэн сылдьар худуоһунньуктар быыстапкаларын уонна артыыстар кэнсиэртэрин тэрийээччи Жан-Мишель Шеври доҕотторунуун ыалдьыттыыр. Бэлиэтээн эттэххэ, Жан-Мишель Саха сиригэр 1999 сылтан сөбүлээн кэлэр.
Соторутааҕыта оҕолорго аналлаах “Саха сиригэр күн бырааһынньыга” Кыым сэлиичээн туһунан кинигэтин III чааһа таҕыста. Ити иннинэ “Кыым сэлиичээн”, “Кыым сэлиичээн – циркэҕэ” диэн ааттаах кинигэлэрэ тахсыбыттара. Кинигэҕэ Саха сиригэр түһэриллибит хаартыскаларынан дьэрэкээн уруһуйдар киллэриллибиттэрэ ордук кэрэхсэбиллээх.
“Бэлэм буол+” хаһыат Жан-Мишель Шеври айымньытынан уһуйаан иитиллээччилэригэр уонна оскуола оҕолоругар уруһуй, оҥоһук, тылбаас күрэстэрин ыытта. Барыта 10-ча улуустан уонна Дьокуускайтан 200-тэн тахса үлэ киирдэ. Бүгүн ыалдьыттар күрэх быыстапкатын көрдүлэр. Ону тэҥэ суруналыыстары кытта сэһэргэстилэр.
– Жан-Мишель, сэлиичээни тоҕо Кыым диэн ааттаабыккыный?
– Мин Саха сиригэр хаһыс да сырыым. Биир оннук сырыыбар сөмөлүөккэ олордохпуна төбөбөр “кыым” диэн тыл көтөн түспүтэ. Онуоха ити тыл сахаларга, арааһа, туох эрэ улахан суолталаах быһыылаах дии санаабытым. Кэнники билбитим – “Кыым” диэн норуот хаһыатын аата эбит. Итинтэн сиэттэрэн айымньым сүрүн дьоруойун Кыым диэн ааттаабытым.
– Француз оҕолоро сэлиичээн туһунан кинигэни хайдах сыаналыылларый?
– Франция оҕолоро кинигэни ааҕан баран Саха сиригэр кэлиэхтэрин баҕараллар. Мин кинигэбиттэн Саха сирин туһунан элбэҕи билиэхтэрэ-көрүөхтэрэ диэн эрэнэбин.
– Худуоһунньук кинигэ ойуутун хайдах уруһуйдууруй?
– Мин аан бастаан айымньыны ааҕан баран тута бэйэбэр чугастык ылыммытым. Уруһуйдуурбар саха норуотун култууратын кытта билистим.
– Оҕолор үлэлэрин туһунан тугу этиэххит этэй?
– Олус элбэх үлэ киирбититтэн сөхтүбүт. Оҕолор бука бары кыһамньылаахтык уонна кичэллээхтик оҥорбуттара көстөр. Хас биирдии оҕо үлэтэ уратытын бэлиэтээтибит.
“Кыым сэлиичээн мүччүргэннээх сырыылара” күрэс кыайыылаахтарын бээтинсэҕэ “Кванториумҥа” наҕараадалыахтара. Салгыы Жан-Мишель Шеври Хаҥалас Мохсоҕоллооҕор уонна Кэбээйи Мастааҕар ыалдьыттыаҕа.
Лена НЕУСТРОЕВА
