“Якутская топливно-энергетическая компания” АУо бэҕэһээ дьэҥдьиир уонна докумуоннары куоһааһын ыытыллыбыт. Бу туһунан Арассыыйа УФСБ Саха сиринээҕи салаатын пресс-сулууспата иһитиннэрэр.
“Холуобунай дьыала көбүтүллүбүтүнэн сибээстээн, “ЯТЭК” хампаанньаҕа силиэстийэ дьаһаллара ыытыллаллар. Билигин докумуоннары ылыы уонна дьэҥдьиир ыытыллар”, — диэн пресс-сулууспа иһитиннэрэр.
Күн бүгүн ЯТЭК Саха сиригэр мотуор уматыгын оҥорор суос-соҕотох тэрилтэ. Ону таһынан, өрөспүүбүлүкэ ырыынагар бэнсиини, дизель уматыгын уонна массыынаҕа пропан-бутаны атыылыыр.
Хампаанньа оҥорон таһаарар тиһигин бэйэтэ тэрийэр: уматыгы хостуур, оҥорон таһаарар, харайар уонна бэйэтин АЗС, АГЗС нөҥүө бородууксуйатын батарар. ЯТЭК Мэҥэ Хаҥаласка гааһы переработкалыыр комплексы тутан киллэрэр санаалаахтар.
“СПАРК-Интерфакс” аналитика систиэмэтин дааннайдарынан, ЯТЭК сүрүн акционерынан “Сумма” ГК баһылыга Зиявудин Магомедов буолар. “Инвестор” ХЭУо нөҥүө кини ЯТЭК 82,06% аахсыйатын бас билэр.
“Сумма” хампаанньа бөлөҕүн бас билээччилэрэ, ини бии Зиявудин уонна Магомед Магомедовтары Арассыыйа ХК 159 ыст. 4 ч. (масыанньыктааһын), РФ ХК 160 ыст. 4 ч. (олус элбэх үбү сиэһин), ХК 210 ыст. 1 ч. (буруйу оҥорор түмсүүлээх бөлөҕү тэрийии ) уорбалаан холуобунай дьыаланы көбүппүттэрэ уонна кулун тутар 30 күнүгэр Москубаҕа хаайбыттара. Суут кинилэри икки ыйга СИЗОҕа укпута.
