Бу баскыһыанньаҕа хоруона хамсыгыттан толору үтүөрэн тахсыбыт Хоҥор Биэ нэһилиэгин кырдьаҕас олохтоохторо төрөөбүт нэһилиэктэригэр эргилиннилэр. Бу туһунан социальнай ситимнэргэ Нам улууһуттан Ил Түмэҥҥэ дьокутаат Наталья Румянцева кэпсээбит.
“Салбаҥ бэтэрээннэрэ дьиэлэригэр диэри этэҥҥэ көтөн тиийдилэр. Бу нэдиэлэҕэ толору үтүөрэн тахсыбыт, икки кэлиҥҥи анаалыстара “-” көрдөрбүт олохтоохтору дьиэлэригэр төннөллөрүгэр көҥүллээбиттэрэ. Нэһилиэккэ харантыын ыам ыйын 20 күнүгэр биллэриллибитэ, сорох ыалдьыбыт дьону Намҥа бэйэтигэр уонна Дьокуускайга санрейсинэн аҕалбыттара. Үтүөрбүт дьон бастаан утаа аймахтарынан уонна Намнааҕы техникум уопсайыгар олорбуттара. Салбаҥ – ойуччу турар, суола-ииһэ суох кырыы нэһилиэк. Инньэ гынан, сааскыттан саҕалаан күһүҥҥээҥи дылы сырыы суоҕун тэҥэ, суол-иис мөлтөх. Билигин онно танкетаканан уонна вездеходунан эрэ айаннаан тиийэҕин. Инньэ гынан, саастаах дьону эрэйдээбэккэ, сөмөлүөтүнэн тиэрдэллэригэр кэпсэппиппит”, диэн Наталья Румянцева суруйар.
Санатар буоллахха, Салбаҥ нэһилиэгэ (Хоҥор Биэ) хоруона хамсыгар улаханнык эмсэҕэлээтэ. Манна ыам ыйын бырааһыньыктааҕы өрөбүллэригэр ковидтаах кусчут тиийэн сутуйбут диэн сурах тарҕаммыта. Ол түмүгэр уонунан олохтоох киһи сутуллубута. Ыараханнык ыалдьыбыттары суһаллык Намҥа уонна Дьокуускайга аҕалбыттара. Билигин үтүөрбүттэр дойдуларыгар төннөн эрэллэр. Бэс ыйын 11 күнүгэр Ил Дархан үтүөрбүттэрин туһунан ыспыраапкалаах дьону нэһилиэккэ киллэрэр туһунан ыйааҕа тахсыбыта.
