Ааспыт суукка устатыгар Саха сиригэр 85 саҥа короонавирустаабыт киһи бигэргэммитэ, онтон 71 киһи – Дьокуускайга. Бу туһунан эрэгийиэннээҕи оперштаб салайааччыта, вице-премьер Ольга Балабкина киэһээҥҥи брифинг кэмигэр кэпсээтэ.
Инньэ гынан, бэс ыйын 15 күнүнээҕи туругунан уопсайа 3122 киһиэхэ COVID-19 диагноһы туруорбуттар, олоторн 1834 киһи үтүөрбүт.
“Бэ ыйын 21 күнүгэр Мэдэссиинэ үлэһиттэрин идэлээх бырааһынньыктара буолар. Медиктэр түүннэри-күнүстэри туруулаһан, номнуо 1834 коронавирустаабыт киһини үтүөрдүбүттэрин тоһоҕолоон туран, үрүҥ халааттаах аанньалларбытыгар өссө төгүл махтаныах тустаахпыт”, - диэн Ольга Балабкина тоһоҕолоото.
Ольга Балабкина эппитинэн, бу дьаҥ киин куоракка эрэ буолбакка, улуустарга күүскэ тарҕанан эрэр. Кэккэ улуустарга туох да биллэр ыарыы сибикитэ суох ыалдьар оҕолор нөҥүө тарҕаммыта бэлиэтэнэр. Ил Дархан ыйааҕынан, билигин куораттартан тыа сиригэр барар оҕолору икки нэдиэлэ устата профилактическэй, мэдэссиинэ кэтээн көрүүтэ булгуччуламмыт.
“Инньэ гынан, нэһилиэктэр, куораттар дьаһалталара хас кэлбит киһини учуоттуохтара. Маннык дьаһал бырабыыталыстыба миэстэтигэр оҕолорго мэдэссиинэ көмөтүн оҥорорго бэлэмин мэктиэлиир. Маныаха төрөппүт көҥүлүнэн эрэ көмөнү ыытыахпыт”, - диэн вице-премьер эттэ.
От ыйын 1 күнүттэн өрөспүүбүлүкэҕэ тулаайах, төрөппүт көрүүтэ-истиитэ суох хаалбыт оҕолорго сайыҥҥы сынньалаҥ уонна чэбдигирдэр лааҕырдар арыллалларын кэпсээтэ.
Андрея Сорокина, СИА хаартыскаҕа түһэриитэ.
