Өрөспүүбүлүкэ Ил Дархана этэринэн, мантан антах Чайыҥдаҕа саҥа баахтаһыттары илдьэр-аҕалар усулуобуйа биллэ уларыйыахтаах.
Билигин онно биир даҕаны ыалдьыбыт, сутуллубут киһи хаалбатах. Ол туһунан Айсен Сергеевич бэҕэһээ “Өлүөнэ кулуубугар” – Уһук Илин кыһалҕаларын дьүүллэһэр түһүлгэ мунньаҕар эттэ. Чайыҥдаттан барыларын (10,5 тыһ. киһини) таһаарбыттар, эмтээбиттэр. Номнуо саҥа үлэһиттэр баран эрэллэр.
Санаттахха, Чайыҥдаҕа муус устар 17 күнүгэр харантыын биллэрбиттэрэ. Кэлин онтон 8,3 тыһ. киһи дьиэлэригэр, эмтэнэр сирдэригэр тиэрдибиттэрэ. Өрөспүүбүлүкэ салалтата ол барбыт дьон оннугар олохтоох, бэйэбит дьоммутун үөрэттэрэн илдьэр санаалааҕын биллэрбитэ. 2020 уонна 2021 сылларга барыта 600 киһини үлэнэн хааччыйар туһунан сөбүлэҥ түһэрсиллибитэ.
“Өлүөнэ кулууба” – 2019 сыллаахха тэриллибит, федеральнай таһымнаах эспиэрдэр эрэгийиэн бэрэстэбиитэллэрин кытта Уһук Илин кыһалҕаларын дьүүллэһэр, кэпсэтэр түһүлгэлэрэ.
