Саха сирин борокуратуурата урукку үөрэх миниистиригэр Владимир Егоровка административнай дьыаланы көбүппүт уонна бэрэбиэркэ маырыйаалларын Федеральнай антимонопольнай сулууспаҕа ыыппыт.
Экс-миниистир былырыын атырдьах ыйын 1 күнүгэр “КП Организатор” диэн тэрилтэни кытары дойду киин куораттарын кыһаларыгар өрөспүүбүлүкэ бүддьүөтүттэн тус сыаллаах миэстэлэргэ үөрэттэрэргэ өрөспүүбүлүкэтээҕи тутар хамыыһыйаны үлэлэтиигэ судаарыстыбаннай хантыраагы түһэрсибит. Бу хантыраак 2 699 950солк. суумалаах. Борокуратуура бу тутар хамыыһыйа бэс ыйын бүтүүтэ номнуо үлэлээбитин, оттон тендер хойутаан – от ыйын 11 күнүгэр биирдэ биллэриллибитин быһаарбыт. Онуоха борокуратуура антимонопольнай сокуону кэһии тахсыбытын учуоттаан, дьыаланы салгыы УФАС көрүүтүгэр ыыппыт.
Маны таһынан, борокуратуура Владимир Егоровка судаарыстыбаннай хантыраак түмүгүн хантыраактаахтар тендердэригэр иһитиннэриини ыыппатаҕын иһин РФ КоАП 7.31 ыст. 2 ч. административнай дьыаланы көбүппүт.
