Ньурба улууһун суола-ииһэ мөлтөх, киинтэн балай эмэ ыраах сытар, Марха өрүс сүнньүгэр турар Бордоҥ нэһилиэгэр от үлэтэ үгэннээн турар.
Маалыкайга тыа хаһаайыстыбатынан дьарыктанар сүрүн тэрилтэлэринэн: “Сайдыы” СПК, “Маалыкай” ТХПК, “Мондоку” ХЭУо, Степан Васильев аатынан Сылгы собуота, 6 КФХ уонна ЛПХ буолаллар.
Нэһилиэккэ 1601 ынах сүөһү, 2660 сылгы, 15 сибиинньэ, 101 куурусса, 12 хаас, 7 кус, 2 коза баар. Быйыл Күндээдэттэн эбии 7 ньирэйи аҕалбыттар.
Тыа хаһаайыстыбатынан утумнаахтык дьарыктанар Владимир Матвеев үс тэрилтэлээх. Кинилэр хас сайын ахсын “Айда” сайылык ферматыгар ыаллар сүөһүлэрин көрөллөр. Онно 4 үлэһиттээх: бостуук уонна 3 ыанньыксыт.
Маалыкайга олохтоох дьаһалта үүт туттарааччыларга эбии 1 лиитирэҕэ 2-лии солкуобайы көрөр. Кыһынын ынах уулууругар ойбону тэһээччигэ анал хамнас көрүллэр. Ыалтан биирдии сүөһү иһин – 75-тии солк. хомуйаллар, ону таһынан эбии дьаһалтаттан 15000 солк. көрүллэр.
Билигин күнү-дьылы баттаһа дьон ходуһаттан арахпат. Бордоҥ нэһилиэгэр былырыын 2727 туонна от кэбиһиллибит эбит буоллаҕына, быйылгы былаанынан, маалыкайдар 2875 туонна оту бэлэмниэхтээхтэр. Быйыл от үүнүүтэ былырыыҥҥытааҕар үчүгэй. Ордук хотоол сирдэргэ от арыый үүммүт, арай хордоҕой сир мөлтөх үүнүүлээх.
Былаан быһыытынан 220 туонна үүт ыаныллыахтаах. Маалыкайдар бу былааннарын ситиһэргэ саарбахтаабаттар. Күөх сайынтан өлгөм үүтү ыырга күүстээхтик туруналлар.
Сардаана Николаева, ХИФУ 3-с кууруһун устудьуона.