Сибиир сиригэр, ол иһигэр Саха сиригэр, айылҕа уларыйыытын биир улахан охсуутунан сайын аайы улахан ойуур баһаардара турар буолбуттарын ааттыыллар.
Уоту утары охсуһууга аан бастаан олохтоох дьон туруналлар. “Умнаһыт бурдугун тыал көтүппүт үһү” диэбиттии, алдьархай ыксалыгар ылларбыт тыа дьоно кыра дохуоттарыттан уолаттарын астарын-таҥастарын, тиэхиньикэлэрин бэйэлэрэ тэрийэн ыыталлар.
Быһаас муус устарга Арассыыйа бэрэсидьиэнэ В.Путин ойуур баһаардарын уонна халааны утары охсуһуу туһунан ыыппыт мунньаҕар Ил Дархан А.Николаев ойуур федеральнай бас билии буоларынан, баһаары умулларыыны сэргэ, умулларыыга сылдьар дьону аһынан уонна иһэр уунан босхо хааччыйыыны федеральнай бүддьүөттэн үбүлүүр боппуруоһу күүскэ туруорсубута, дакаастаабыта. В.Путин боппуруоһу сөптөөх диэн өйөөбүтэ, бырабыыталыстыбаҕа тустаах тустаах сорудах биэрбитэ.
Бэрэсидьиэн сорудаҕа силигэ ситэн, хантан, хайдах үбүлэнэрэ быһаарыллан, олоххо киирэн эрэрин туһунан от ыйын 27 күнүгэр премьер М.Мишустин вице-премьердэри кытта ыыппыт мунньаҕар иһитиннэрдэ.
Быйылгы үбүлээһин хайдах оҥоһуллуохтааҕа, дьоҥҥо хайдах төлөнүөхтээҕэ, кэмпэнсээссийэ буолар дуу, хайдах дуу, мэхэньиисимэ биллиэҕэ. Оттон судаарыстыба бу үбү бүддьүөккэ сыл аайы былааннанан киллэрдэҕинэ, ыксаллаах быһыы кэмигэр тыа дьонугар улахан абыраллаах көмө буолуоҕа.
