Мииринэйдээҕи политехническэй институт – Максим Аммосов аатынан Хотугулуу-Илиҥҥи Федеральнай университет бөдөҥ салаата.
Бырамыысалыннас аныгы ирдэбиллэрин учуоттаан, инникитин МПТИ ньиэп-гаас уонна энэргиэтикэ салаатын өссө күүһүрдэр соруктаах.Биллэрин курдук, Мииринэй, Ленскэй, Сунтаар, Өлүөхүмэ оройуоннарыгар ньиэп уонна гаас индустрията балысханнык сайдар.
Ханна ньиэп-гаас геологическай учаастага, сир баайын хостооһун бааллар да, сонно үрдүкү идэтийиилээх үлэһиттэри күүтэллэр.
Кыбытан эттэххэ, Мииринэй оройуона сыллата 4 мөлүйүөн туонна аҥаардас ньиэби хостуур. Миллиардынан кууп айылҕа гааһа хостонорун этэ да барыллыбат.
Мииринэй уонна Ленскэй оройуоннарыгар “Газпром”, “Роснефть”, “Сургутнефтегаз”, “Иркутскайдааҕы ньиэп хампаанньата», «РНГ», «Илин Сибиир», «Недра», «Сюльдюкарнефтегаз» уо.д.а бырамыысалыннастаах тэрилтэлэр күөнтээбиттэрэ ыраатта.
“Айылҕабытын буортулууллар, онон муҥ саатар олохтоох дьону хамнастаатыннар” диэн сорук турар.
«Роснефть» салаата – «ТаасҮрэхнефтегаздобыча” Саха сирин арҕаа эҥэригэр кэлиэҕиттэн ылата, МПТИ выпускниктарын син кыралаан үлэҕэ ылар буолуталаан эрэллэр.
Биллэрин курдук, Мииринэйдээҕи политехническай институт биир сүрүн хайысхатынан – ньиэп-гаас отделениета буолар.
Оттон МПТИ дипломниктарын аахсыбатахха, Таас-Үрэххэ нефтяниктарга 32 саха дьоно үлэлиир.
Аны билигин Ленскэй оройуонун Чайыҥдатыгар «Сила Сибири» федеральнай таһымнаах гаас хостуур уонна ИСТА ситиминэн суккутар сиригэр, олохтоох каадырдар ирдэнэллэрин бырабыытылыстыбабыт ситиһэн эрэр.
Ону учуоттаан, МПТИ сайдара, кэҥиирэ күүтүллэр. Биллэн турар, маны барытын ХИФУ салалтата быһаарар.МПТИ Ойуунускай уулуссатын 11-гэр баар сүрүн куорпуһугар, Тиихэнэп 5 аадырыһыгар баар административнай чааһа көһөн турар.МПТИ устудьуоннарын уопсайа Солдатов уулуссатын олорор дьиэтин биир подъеһыгар баар. Кыараҕастык олороллор. Московскай уулуссатыгар МПТИ биир эрэ бэйэтэ бас билэр уопсай дьиэлээх.Манан көрдөххө, МПТИ саҥа уопсайдары туруорсара оруннаах.
Саха сирин арҕаа өттүгэр соҕотох үрдүкү үөрэх кыһатыгар - Мииринэйдээҕи политехническай институкка икки уопсай дьиэ уонна успуорт саалата тутуллуохтара.
Бу былаан болдьоммут кэмигэр олоххо киирдэҕинэ, МПТИ өссө сайдыа-чэчириэ турдаҕа.
Станислав Алексеев. Мииринэй куората. Ааптар хаартыскалара.
