“Алдаҥҥа быйыл ыытыллар Олоҥхо ыһыаҕын ыспат туһунан быһаарыныыны бырабыыталыстыба ылымматаҕа. Олоҥхо Ыһыаҕа диэн саха норуотун үгэстэрин уонна устуоруйатын илдьэ сылдьар улахан суолталаах тэрээһин. Ону тэрийэргэ аккаастыыр туһунан кэпсэтии да барбат”, - диэн бырабыыталыстыба бэрэссэдээтэдэ Евгений Чекин иһитиннэрэр.
Билигин Олоҥхо Ыһыаҕын сыл ахсын буолбакка, төһө кэм арыттаах ыытылларын туһунан боппуруос турар. “Олоҥхо Ыһыаҕын ыытарга 200 мөл. солк. курдук үп көрүлэр. Бачча үп биир күҥҥэ эрэ анаан “ыскайданар” буолбатах. Маннык киэҥ далааһыннаах дьаһалларга көрүллэр үп улуус, нэһилиэк олоҕун улаханнык сэргэхситэр. Элбэх тутуу, өрөмүөн ыытыллар. Инньэ гынан, маннык тэрээһиннэри ыытарга олохтоох былаас улахан интэриэстээх”, - диэн премьер бэлиэтиир.
Билигин бүддьүөт кырыымчыгынан сибээстээн, хас биирдии кэппиэйкэ ааҕыллар. Бүддьүөт харчытын сиэрдээхтик уонна туһалаахтык туһаныы бастакы соругунан буолар. Бастатан туран, бүддьүөт социальнай хайысхалаах буоларын ситиһэллэр. Хас биирдии кэлтэгэй кэппиэйкэни ааҕар быыһык кэмҥэ улахан суолтата суох, ороскуоттаах дьаһаллартан аккаастаныы ыытыллыахтаах. Бу хайысхаҕа үлэ өссө да түмүктэнэ илик. Сарбыйыллар эбэтэр көһөрүллэр тэрээһиннэр испииһэктэрэ чуолкайдана илик. Ол оҥоһулуннаҕына, хайаан да Ил Дархан көрүүтүгэр ыытыллыахтаах.
Олоҥхо Ыһыаҕа быйыл бэс ыйын 30 – от ыйын 1 күннэригэр Алдан куоракка ыытыллыахтаах. Бигэргэтиллибит смета быһыытынан, Олоҥхо Ыһыаҕын чэрчитинэн 15 өрөспүүбүлүкэтээҕи күрэх уонна 7 спорт күрэхтэһиилэрэ ыытыллыахтаахтар.
Сэҥээриилэр