Көмпүүтэр оонньууларын оҥорууннан дьарыктанар ини-бии Ущницкайдар MYTONA хампаанньалара М.К. Аммосов аатынан Хотугулуу-Илиҥҥи федеральнай университет инфраструктурнай технологияларын колледжтарыгар программирования кууруһугар аналлаах көмпүүтэр кылааһыгар тэрили ылан бэлэхтээтэ. Бу туһунан университет иһитиннэрэр.
“Бу кэбиниэккэ анал куурустар ыытыллыахтара. Сотору кэминэн хамсыкпыт бүтэн, устудьуоннар саҥа кэбиниэккэ астына-дуоһуйа үөрэниэхтэрэ диэн эрэнэбит. Билигин дистанционнай үөрэхтээһин күүскэ сайдан турар. Онон бу куурус онлайн форматынан ыытылларын эмиэ тобулабыт”, - диир информационнай систиэмэлэри хааччыйыы кафедратын сэбиэдиссэйэ Галина Протодьяконова. Кафедра сэбиэдиссэйэ этэринэн, колледжка 20-тэн тахса IT-кэмпитиэнсийэлэри киллэрэр былааннаахтар. Онуоха MYTONA үлэһиттэрэ колледж устудьуоннара WorldSkills Russia күрэххэ бэлэмнэнэллэригэр эрчийиэхтэрэ.
