Куорат бөдөҥ кыбаарталларын олохтоохторо МПЖХ салайар хампаанньаны кытары хоммунаалынай өҥөнү аахсарга, ол иһигэр итии-тымныы уу уонна уот көрдөрүүлэрин биэрэргэ 2018 сыллаахха дуогабар түһэрсибиттэрэ.
Аны билигин, МПЖХ РКЦгар (хоммунаалынай өҥө иһин төлүүр сир) бөх тиэйиитигэр уонна уот төлөбүрүгэр эрэ аахса тиийэр буоллубут. Билигин итии-тымныы уу иһин төлөбүрү ПТВС тэрилтэтэ ылар. Аны онно анаан, ПТВС-ын кытары, дуогабар түһэрсиэххин наада. Ол туһугар, дьиэҥ туох баар докумуонун, тус бэйэҥ пааспарыҥ, кыбартыыра тэхиниичэскэй пааспарын, ИНН, СНИЛсиҥ куоппуйаларын ПТВСка тириэрдиэххин наада. ПТВС клиеннэргэ сайыны, күһүнү быһа сабыылаах турда. Хоруона хамсыга буолан, докумуоннар куоппуйаларын, аналлаах дьааһыкка уктараллар эбэтэр электроннай буостанан, сканердаммыт файллары ылаллар. Кыбартыыраҕа икки хаһаайын баар буоллаҕына, дуогабарга аналлаах докумуону иккиэн толороллор. Дуогабара суох лицевой счет эйиэхэ бэриллибэт. Оттон лицевой счета суох хоммунаалкаҕын кыайан төлөөбөккүн.
Итии-тымныы уу иһин төлөбүрү Интернекка тус кэбиниэт оҥостон төлөһүөххүн сөп. Эбэтэр хас биирдии ый 23-с чыыһылатыгар диэри, ПТВС аналлаах төлөппүөнүн нүөмэригэр диспиэччэргэ эрийэн, итии-тымныы ууҥ көрдөрүүлэрин биэрэҕин. Кинилэр онно олоҕуран төлөбүр квитанциятын эн аадырыскар ыытыахтаахтар. Оннук квитанциялаах буостаҕа баран уочараттаан төлүүгүн. Аны биир ньыма баар эбит. Мииринэйдээҕи Энергосбыкка ПТВС терминалын туруорбуттара.
Терминал мониторыгар ыйыллыбыт суруктарынан сирдэтэн, лицевой счеккун, олорор аадырыскын суруйан киллэрэн, ыраас харчынан эбэтэр баан каартатынан төлүүгүн. Онон хоммунаалынай өҥөнү Интернетынан сатаан төлөөбөт дьоҥҥо, уустук буолла. Урут РКЦга баран биирдэ төлөөн кэбиһэр эбит буоллаххына, билигин хас да сири кэрийэҕин, Энергосбыкка, ПТВСка, буостаҕа тиэстэргэр тиийэҕин.
Станислав Алексеев. Мииринэй куората. Ааптар хаартыскатыгар хоммунаалынай өҥөнү төлүүр терминал.
