Зампред Ольга Балабкина өрөспүүбүлүкэҕэ хоруона хамсыгын туругун брифинг кэмигэр билиһиннэрдэ.
Ол курдук, ааспыт сууккаҕа 80 киһи эбии ыалдьыбыта бигэргэммит. Дьокуускайга – 40, Мииринэйгэ – 6, Мэҥэҕэ – 5, Эдьигээҥҥэ, Ньурбаҕа, Чурапчыга – 4-түү, Алдаҥҥа, Аммаҕа, Үөһээ Бүлүүгэ, Сунтаарга – 3-түү, Булуҥҥа, Бүлүүгэ – 2-лии, Орто Халымаҕа – биир киһи ыалдьыбыттара биллибит. Суукка устатыгар 2591 коронавируска тест оҥоһуллубут. Уус Алдан улууһугар Лөгөй орто оскуолатын интэринээтигэр (билиҥҥи үөрэх миниистирин дойдутугар) хоруона хамсыгар маассабайдык сутуллубуттар:
-- Оскуола дистанционнай ньымаҕа толору көстө. Стационарга 22 оҕо эмтэнэ сытар, кинилэри кытта алтыспыт дьон интэринээккэ эмчиттэр көрүүлэригэр сыталлар. Кылааска эбэтэр бөлөххө биир киһи ыарыйда да бары дистанционнайга көһөллөр.
Маны таһынан, Ольга Балабкина 65 саастарыттан үөһээ саастаах дьон уонна хроническэй ыарыылаахтар үлэҕэ тахсыа суохтаахтар диэн тоһоҕолоон эттэ. Маннык быһаарыныы саастаах дьон элбэхтэ сутуллар буолбуттарын кытары ситимнээх.
