Балаҕан ыйын 27 күнүттэн саҕалаан, Азербайджан уонна Армения икки ардыларыгар Хайалаах Карабаҕы былдьаһар уочараттаах сэрии өрө көбөн таҕыста.
“Билигин Азербайджан сэбилэниилээх күүстэрэ киэҥ далааһыннаах, Карабах оборуонатын кирбиитин барытын хабар учаастагынан кимэн киирэн эрэллэр“ диэн суруйаллар. Ол хапсыһыыларга аныгы байыаннай тиэхиньикэ, артылыарыйа, тааҥка, “беспилотник”, бөртөлүөт уо.д.а. барыта туттулла турар. Икки өттүттэн дьон сүтүгэ бөҕө тахсыбыта сылыктанар эрээри, иирсээннээх өрүттэр “өстөөх хас эмэ сүүһүнэн киһи, уонунан тиэхиньикэ сүтүктэннэ, биһиги кыайан иһэбит” эҥин диэн аһара баһыылаах информацияны тарҕатар буоланнар, ким кырдьыгын быһаарар кыах суох. Сэриини ким саҕалаабыта эмиэ биллибэт.
Турция бэрэсидьиэнэ Реджеп Тайип Эрдоган иирсээн саҕаланарын кытта тута Азербайджаны өйүүрүн биллэрбитэ, ону ааһан “армяннар Азербайджан сириттэн тахсан биэриэхтээхтэр. Азербайджан былаастара армяннар хаһан тахсан баралларын 30 сыл күүтэ сатаатылар, сөп буолуо. Армяннар былдьаабыт сирдэриттэн тахсан бардахтарына эрэ бу эҥээргэ дьиҥнээх ил-эйэ олохтонуо. Биһиги бырааттыы Азербайджаҥҥа туох кыалларынан барытынан көмөлөһөргө бэлэммит” диэбитэ.
Бу күннэргэ өссө Афганистан былаастара эмиэ Азербайджан туһугар ыалдьалларын биллэрдилэр, “армяннар күүстэринэн былдьаабыт сирдэриттэн тахсан барыахтаахтар” диэтилэр.
Хайалаах Карабахха бара турар хабыр хапсыһыыларга Арассыыйа салалтата, мэлдьи да буоларын курдук, армяннар диэки ыалдьар.
Санаттахха, уруккута Азербайджан сэбиэскэй өрөспүүбүлүкэтин састаабыгар киирэр Хайалаах Карабах 1991 с. “манна армяннар ахсаан өттүнэн баһыйабыт, онон Азербайджан састаабыттан тахсабыт” диэн тутулуга суох буолууну биллэрбитэ. Ол кэннэ үс сылы быһа салҕанан барбыт сэриилэр түмүктэригэр Азербайджан кыайтаран, манна олохтоох азербайджан дьоно куотан барарга күһэллибиттэрэ, эбиитин, армяннар Карабаҕы кытта ыаллаһа сытар Азербайджан 4 оройуонун былдьаан ылбыттара.
Онон, бу иирсээн өссө да өр салҕанан барара сылыктанар.
