Бэҕэһээҥҥиттэн социальнай ситимнэргэ, бассаабынан Ньурба улууһун хоруона хамсыгын бохсор суһал штабын иһитиннэриитэ күүлэйдээбитэ. Онно улууска коронавируска күн устата 27 киһи сутуллубут диэн этиллибитэ.
Улууска ыарыы эмискэ хайдах улааппытын бүгүн зампред Ольга Балабкина брифинг кэмигэр быһаарда. Кини дьон норуот эмчититтэн сыстыспыттар диэн бигэргэттэ.
“Биһиги Роспотребнадзортан бу балаһыанньаны бигэргэтэллэригэр официальнай быһаарыыны күүтэбит. Ньурба улууһугар атын улуустан норуот эмчитэ кэлбит уонна элбэх киһини көрбүт. Хомойуох иһин, ол эмчиппит бэйэтэ ковидтаах буолан биэрбит. Киниэхэ сылдьыбыт дьону барыларын изоляцияҕа ыыттылар, анаалыс ыллылар”, - диэтэ Ольга Балабкина.
Ити кэннэ эмтэнэн абыраныҥ. Эмчиппит бэйэтин туругун да быһаараахтаабатах барахсан эбит. Ыалдьыбыттарга түргэнник үтүөрэллэригэр баҕарабыт.
