Алтынньы 1-10 күннэригэр Саха сирэ коронавирустаах дьону балыыһаҕа киллэрэн эмтииринэн дойдуга иккис миэстэҕэ тахсыбыт. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.
Хоруона хамсыгын бохсор суһал штаб мунньаҕар иһитиннэрбиттэринэн, бу кэм устатыгар өрөспүүбүлүкэҕэ 100 тыһ. нэһилиэнньэҕэ 225 киһини балыыһаҕа симпиттэр. Мунньах кыттыылаахтара балыыһаҕа киирэр дьону туох-ханнык чуолкай киритиэрийдэринэн талыахтаахтарын быһаарарга эппиттэр. Маны таһынан, эрэгийиэҥҥэ “сэбиргэхтэтии” диагнозтаах дьон аҕыйахтара бэлиэтэммит. Ити Саха сирин быраастара сэбиргэхтэппит дьоҥҥо чуолкайдык сөптөөх диагноһы туруоралларын туоһулуур үһү. Күн бүгүн Саха сиригэр 2583 куойка баар. Ил Дархан Айсен Николаев дойду бырабыыталыстыбата биэрбит анаалыһыгар сигэнэн, өрөспүүбүлүкэ хамсыгы бохсууга куһаҕана суохтук киирсэр диэн бэлиэтээбит. Кини улуустарга изоляцияҕа барбыт дьону уонна тутуу эйгэтигэр саҥа эбийиэктэри туттарыыга куттал суоһаабатын хонтуруоллууларыгар эппит.
