Алдан улууһугар баар куораттыҥы тииптээх Ленинскэй бөһүөлэгин быһа охсон ааһар Үөһээ Кураанах эбэни туоруур 12 миэтэрэ уһуннаах тимир күргэ тутуллар буолла. Күргэни тутуу үбүлээһинэ өрөспүүбүлүкэ олохтоох көҕүлээһини өйүүр бырагырааматын иһинэн көрүллүө.
Биир эмиэ өрөспүүбүлүкэ бүддьүөтүттэн үбүлэнэр бырайыак талылынна. Ол – Лебединэй бөһүөлэгэр баар “Дом здоровья” сарайын өрөмүөннээһин. Бу бөһүөлэк олохтоохторун түмэр, сомоҕолуур биир бэлиэ тутуу. Манна Алданнааҕы ДЮСШ салаатын хайыһардьыттара дьарыктанар сирдэрэ баар.
Бу икки бырайыакка уопсайа 2 мөл. солк. субсидия ананар. Ону таһынан олохтоох бүддьүөттэн 200 тыһ. кыттыгас үбү көрбүттэр, биир итиччэ үбү олохтоохтор кыттыһаллар. Ону таһынан тимир күргэ тутуутугар 150 тыһ. солк. успуонсардартан буларга суоттаналлар.
