Киһи киҥкиниир киэҥ куйаарга көппүт бэлиэ күнүгэр "Күрүлгэн" сурунаал иккис тахсыытын бэчээттэн ылабыт.
Сарсыҥҥыттан эбэтэр бүгүн күн иккис аҥаарыттан даҕаны Бэчээт дьиэтин 110 хоһуттан атыылаһыахха сөп. "Горпечать" киоскаларыгар эмиэ атыыга тахсыаҕа.
Оттон сорох улуустарга хайыы үйэ тиийбитэ буолуо. Сорохторго бара турар. Дьокуускайга почтанан тиийиитэ бытаан соҕус буолааччы.
Бу сырыыга "Күрүлгэн" Саха сирин ааҕааччыларыгар 3000 ахсаанынан тиийиэҕэ.
Муус устар 19 күнүгэр диэри чэпчэтиилээх сурутуу барар. Түгэни мүччү тутумаҥ! Сыана биллэ чэпчиир.
Итиэннэ бүгүн 12 чаастан почтамҥа Бүтүн Арассыыйатааҕы "Дерево Добра" тэрээһин чэрчитинэн киэҥ сурутуу ыытыллар. Кыттыһыҥ, көхтөөхтүк холбоһуҥ!
"Күрүлгэн" кэлэр нүөмэригэр норуодунай суруйааччы Сэмэн Руфов эдэр хоһоонньут айымньытын ол хоһоонньукка бэйэтигэр анаан хайдах ырыппыта тахсыаҕа. Тэтэрээккэ хас хоһоон ахсын бэлиэтээһиннэри оҥорбут эбит. Уонна хоһоонньукка бэйэтигэр анаан суруйбут суруга баар.
Итини таһынан, чинчийээччи С.Е. Ноева "Күрүлгэн" былырыыҥҥы күрэхтэһиитигэр киирбит кэпсээннэри, сэһэннэри ырытыыта бэчээттэниэҕэ.
Суруйааччыларга, суруйар дьоҥҥо эмиэ туһалаах буолара чахчы.
Ону сэргэ, ити күрэхтэһиигэ киирэн эмиэ да сэҥээриллибит, эмиэ да сириллибит сэһэн тахсыаҕа. Оннук уустук ис хоһоонноох айымньы. Биир киһи хайгыыр, иккис киһи букатын ылыммат диэбит курдук. Нууччалыы эттэххэ, лёд и пламя "Тэлэһийэ сылдьан..." диэн ааттаах. Тоһукка диэн кистэлэҥ аатынан күрэхтэһиигэ киирбитэ. Ол эрэн, сурунаалга ааптар дьиҥнээх аатынан тахсыаҕа.
