Бу сыл 9 ыйын түмүгүнэн Саха сиригэр арыгыны иһии уонна арыгыны атыылааһын ачаабыт. Бу туһунан Ил Түмэҥҥэ арыгы эргиирин уонна аһыы утаҕы иһиини хааччахтыыр сокуон эйгэтигэр анаммыт мунньахха кэпсээтилэр.
“2020 сыл 9 ыйын түмүгүнэн өрөспүүбүлүкэҕэ 2,7 мөл. декалитр, ол иһигэр 290 тыһ. декалитр олохтоох арыгы бородууксуйата атыыламмыт. Ити ааспыт сыллааҕыга холоотоххо, 22 бырыһыанынан кыра”, - диэн Максим Прокопьев дакылааттаата.
Доруобуйа харыстабылын миниистирин бастакы солбуйааччы Алексей Яковлев этэринэн, 9 ый түмүгүн даанайдара кэпсииллэринэн, Саха сирин биир олохтооҕор быһа холоон 4,6 лиитирэ аһыы утах тиксэр эбит. Кини хоруона хамсыгынан сибээстээн арыгыны иһии аччаабытын бэлиэтээтэ. 9 ый түмүгүнэн арыгыттан психоз - 39 бырыһыан, арыгы иһиититтэн өлүү – 13 уонна атын биричиинэттэн өлүү – 17, киһи илиититтэн өлүү 13 бырыһыан аччаабыт эбит.
ИДьМ отчуоттуурунан, Саха сиригэр арыгы иһэн баран буруйу оҥоруу эмиэ ачаабыт. Быйыл арыгыны иһэн баран 3269 буруй оҥоһуллубут, оттон былырыын баччаларга 3518 этэ.