“Сосновый бор” сылы устата үлэлиир оҕо сынньалаҥын уонна чэбдигирдиитин киинигэр хоруона хамсыгар хаптарбыт 120 оҕо реабилитацияны ааһыаҕа.
Киин мэдэссиинискэй үлэһиттэрэ маныаха аналлаах чэбдигирдии уонна чөлүгэр түһэрии бырагырааматын оҥорбуттар: тыыныы гимнастиката, кинезиотерапия, туустаах көҥүс (соляная пещера), кислород терапията уонна эмтэнэр физкултуура. Киин салгыны ырааһырдар тэриллэринэн, рециркулятордарынан, антисептигынан толору хааччыллыылаах. Оҕолор ыраас салгыҥҥа көччүйэллэр, күҥҥэ биэстэ иҥэмтэлээх, тотоойу аһынан хааччыллаллар, кислород коктейлын иһэллэр. Маны таһынан, оҕолор сайдалларыгар аналлаах араас тэрээһиннэр, сынньалаҥ кэмэ ыытыллар. Баһаатайдар кинилэргэ анаан саататар тэрээһиннэри ыыталлар. Бу коронавирустаабыт оҕолорго аналлаах анал чэбдигирдэр смена 14 күннээх уонна Роспотребнадзор ыйыытын барытын туһанан ахсынньы 18 күнүттэн үлэтин саҕалыаҕа. Бу сменаҕа киирэргэ үтүөрбүт оҕолор бастаан учаскыабай педитрга тиийэллэр, кини анал мэктиэни биэрэн ыытар. Иккис маннык симиэнэ эһиил эмиэ үлэлиэҕэ.
