Улуус кииннэриттэн уонна куораттартан ыраах, кырыы сытар дьоҕус нэһилиэктэргэ тиийэр биирдиилээн дьон булгуччу ИФА уонна ИХА анаалыһын туттарар буолуохтарын туһунан СӨ Ил Дарханын уонна бырабыыталыстыбатын пресс-сулууспата иһитиннэрэр.
“Ити барыта сылы эргиччи суола-ииһэ суох нэһилиэктэргэ ыарыыны киллэрбэт туһуттан оҥоһуллар”, - диир Айсен Николаев уонна Өлөөн улууһун Ээйик бөһүөлэгэр үөскээбит быһыыттан-майгыттан долгуйарын биллэрэр. Кини этэринэн, ыарыы бөһүөлэккэ кыһыҥҥы айан суола арыллыбытын кэннэ тиийбит. Онон ити хобдох холобур атын нэһилиэктэргэ-бөһүөлэктэргэ хатыланыа суохтаах.
