Cаҥа сыл саҕаланыаҕыттан хамсык төһө да арыый намтаата диэн былаастар отчуоттааталлар, балаһыанньа син биир ыгым. Өрөспүүбүлүкэҕэ Дьокуускайга ордук элбэх киһи ыалдьар эбит буоллаҕына, ону баттаһа алмаастаах Мииринэй арахпакка атыллаан иһэр. Мииринэй улууһугар хоруона хамсыгын балаһыанньатын туһунан Станислав Алексеев Кыым.руга иһитиннэрдэ.
"Саҥа дьыл бырааһынньыгын кэнниттэн суукка ахсын ортотунан 12-15 киһи ыалдьа турда.Муҥутаан тохсунньу ый бастакы күннэригэр биирдэ 20-чэ киһи хамсыкка хаптарбыта.Ыал ыалынан сутуйсаннар ковиднай госпитальга киирэллэр.
Бырамыысалыннас үлэһиттэрэ элбэхтэр.Ковиднай госпиталь эмчиттэрин ноҕуруускалара улахан, алдьархайдаах дьаҥ хабараана халлаан туругун курдук тыйыһыран иһэр.
Госпиталь бастакы этээһигэр көмпүүтэр томограба (КТ) тиһигин быспакка үлэлии турар. Ыарыһахтар сэбиргэхтэтиитэлэрэ уустук буолан, эмтэнии кэмин устата иккитэ-үстэ КТ чинчийиитин бараллара ирдэнэр.
Көмпүүтэр томограбынан тургутуу доруобуйаҕа сүҥкэн буортулааҕын эмчиттэр куруук этэллэр.
Хоруона хамсыга ыарыһах тыҥатын бэрт кылгас кэмҥэ кэбийэ охсоро сөхтөрөр. Онтон оһорунуу бытаан. Бириэмэ наада. Дьон иммунитеттара бу ыарахан дьаҥтан кээрэттэр. Ордук ыараханнык дьарҕа ыарыылаахтар оҕустараллар. Сааһырбыт дьон хоруона хамсыгыттан ордук мөлтүүллэр.Онон, өссө төгүл сэрэтэбин - куруутун сэрэхтээх буолуҥ, ыалдьыттыыргытын букатын аҕыйатыҥ, дьон элбэхтэ тоҕуоруһар сирдэригэр, таһырдьа мааскалаах сылдьыҥ. Биһигини бу ыарыы "хаарыйыа суоҕа" диэн бигэ, эрэх-турах санааҕытыттан аккаастаныҥ", - диэн биһиги Мииринэйдээҕи кэрэспэдьиэммит иһитиннэрэр.
