Ахсынньы 30 күнүгэр “Эбээн Бытантайга саха ынаҕа отунан тутайыа суоҕа” диэн биһиэхэ киирбит суһал сигналы ирдэһии туһунан балаһыанньаны чуолкайдыыр кылгас ыстатыйа бэчээттэммитэ.
Санаттахха, ааспыт сайын уот туран, от үүммэккэ улууска Ньурбаттан, Дьокуускайтан от тиэйиэхтээхтэр. Ол тиэйиитэ саҕаланыыта улууска сыыһа өйдөһүү тахсан, отторо тиийбэт дьону “ТХМ тиэйии ороскуотун 70% эрэ уйунар, улууска үп суох, онон хаалбыт 30% сүөһүлээхтэр бэйэҕит төлүүгүт” диэн онто да суох ыксаан олорор дьону ууга-уокка түһэрии буолбут этэ.
Балаһыанньаны СӨ тыатын хаһаайыстыбатын миниистирэ А.П. Атласовтан уонна ТХМ үүнээйи үүннэриигэ департаменын салайааччытын э.т. Вячеслав Гаврильевтан чуолкайдаан, ТХМ от тиэйиитин төлөбүрүн 100% уйунар диэн быһаарыы ылан суруйбутум.
Тохсунньу 22 күнүгэр ыкса киэһэ Ньурбаттан 43 т.оту тиэммит 3 массыына тиийэн, Кустуур олохтоохторун үөрүүлэрэ муҥура суох. От хаачыстыбата олус үчүгэй, кураанах, күөх диэн ньурбаларга махтаналлар.
Кустууртан от тиэйэн кэлбит суоппардарга махталбытын таһаарыҥ диэн көрдөспүттэрин таһаарабын.
“Махтал сурук! Ыраах Ньурба улууһуттан күп-күөх от тиэйиилээх 3 массыына кэлэн, сүөһүлээх дьон-сэргэ үөрүүтэ баһаам. Ньурба хоһууннарыгар ИП Семенов А.П., суоппардарга Алексеев А.А., Дмитриев А.А. Кустуур олохтоохторо барҕа махталларын тиэрдэллэр. Маннык ыраах сиртэн уһун, сындалганнаах айан кэннэ хараҥанан отторун сүөкээн, айан дьоно тута төнуннулэр. Кинилэргэ сылаалаах улэлэригэр өссө ситиһиини,чэгиэн чэбдик доруобуйаны, тус олохторугар дьолу, көнө суолу баҕарабыт! Аллараа Бытантай нэһилиэгин олохтоох дьаһалтата”.
Ити курдук, бэйэ-бэйэни өйдөһөн, өйөһөн бу уустук кэми, тымныы кыһыны этэҥҥэ туораан, сүөһүбүтүн энчирэппэккэ күөххэ үктэннэриэҕиҥ!
Владимир Степанов.
