Төһө да тоһуттар тымныылар турдаллар, быраастар дьиэни кэрийэн сылдьан ыарыһахтары эмтииллэрин тохтоппоттор. Онуоха быраастары таһарга эбии массыыналарынан хааччыйдылар.
"Билигин дьиэҕэ бырааһы ыҥырыы арыый намыраата. Биһиэхээ таксыы сулууспалара эмиэ көмө-тирэх буолаллар. Маны таһынан тэрилтэлэр — Тыа хаһаайыстыбатын министиэристибэтэ, "Медтранс, бырабыыталыстыба автобазата, "Анаабыр алмаастара", "Резерв клиника, ЯРКВД, мээрийэ тырааныспар биэрэн абырыыллар. Маны таһынан күн ахсын бэйэбит 6 массыынабыт сүүрэр. Ону тэҥэ, дуогабар быһыытынан ЯРКВД икки массыыната быраастары таһар", - диэн куораттааҕы 3-с №-дээх балыыһа пациеннары арыаллыыр сулууспатын отделын начаалынньыга Айталина Копырина иһитиннэрэр.
Эмчиттэр ыарыһахтарга дьиэлэригэр барыылара график быһыытынан ыытыллар. Онуоха тымныы күннэр харгыс буолбатылар.
"Ордук бэнидиэнньиккэ элбэх ыҥырыы киирэр - 300-400 курдук. Күннэтэ ортотунан 200 ыҥырыы киирэр. Холобур, бэҕэһээ 220 ыҥырыыга сырыттылар.Кинилэр ковид биригээдэ уонна боростуой, терапевт быраастар биригээдэлэрэ диэн арахсан көрөллөр. Билигин ковид биригээдэни ыҥырыы аҕыйаата, ол эрээри учаскыабай терапевтары ыҥырыы аччаабат. Ордук дьарҕаа ыарыылаахтар уонна саастаах дьон дьиэҕэ быраастары ыҥыраллар", - диэн Айталина Копырина бэлиэтиир.
Маны таһынан, тымныыларынан сибээстээн, балыыһа дьиэтэ тоҥмокко толору күүһүнэн үлэлииригэр болҕомто ууруллар.
