Киир

Киир

Арктикатааҕы агротехнологическай судаарыстыбаннай университекка (уруккута Тыа хаһаайыстыбатын академията) “өлбүт дууһалар” аҕыс айдааннаах дьыалаларыгар уорбаланар дьон эргимтэлэрэ кэҥээтэ. Аны силиэдэбэтэллэр үс киһини үбү түөкүннээн сиэһиҥҥэ уорбалыыллар. Кинилэр истэригэр АГАТУ Өктөмнөөҕү филиалын дириэктэрин эбээһинэһин толорооччу Павел Афанасьев баар. Киһи сонньуйара диэн, Павел Валерьевич Афанасьев уруккута суут-сокуон эйгэтин үлэһитэ, Үөһээ Бүлүү улууһун борокуруорунан үлэлии сылдьыбыттаах.

Экс-борокуруор уорбаланар

Силиэстийэ сабаҕалыырынан, Павел Афанасьев үөрэх кыһатын боруогун атыллаан да көрбөтөх сымыйа устудьуоннары “үөрэтэн эрэйдэммитин” иһин 14 мөл. солк. тахса бүддьүөт үбүн туһана олорбут. Экс-борокуруорга силиэдэбэтэллэр бөдөҥ сууманы дуоһунаһын аһара туһанан сойботууга күтүрүүллэр.

Павел Афанасьев олоҕун кэрчик кэмнэрин сэгэтэн көрүөҕүҥ. 1980 сыллаахха Покровскайга төрөөбүт. Үрдүк юридическай үөрэхтээх. Дьупулуомун ылан баран Хаҥалас улууһун борокуратууратыгар силиэдэбэтэл дуоһунаһыгар ананан үлэтин саҕалаабыт. 2004 сылтан Саха сирин накаастабылы толорор тэрилтэлэрин дьарайарга Дьокуускай куорат борокуруорун көмөлөһөөччүтүнэн, онтон 2005 сыл балаҕан ыйыттан өрөспүүбүлүкэтээҕи борокуратуураҕа силиэстийэ, дознание уонна оперативнай-ирдиир дьаһаллар үлэлэрин хонтуруоллуур отделга көһөрүллэн үлэлээбит. 2008 сыл ыам ыйыттан Ленскэй улууһун борокуруорун солбуйааччытынан анаммыт. 2009 сылтан Арассыыйа Генеральнай борокуруорун бирикээһинэн, Үөһээ Бүлүү улууһун борокуруорунан барбыт. Ол кэннэ Силиэстийэлиир кэмитиэккэ эҥин үлэлии сылдьыбыт диэн сир-буор аннынан кэпсэтиилэрэ баар. Уопсайынан, Афанасьев быраабы араҥаччылыыр систиэмэттэн уурайан, тыа хаһаайыстыбатын эйгэтигэр исписэлиистэри бэлэмниир эйгэҕэ көспүт.

Силиэстийэлиир кэмитиэт: “Дуоһунаһын аһара туһаммыт”

Арассыыйа Силиэстийэлиир кэмитиэтин Саха сиринээҕи управлениетын салайааччытын СМИни кытары үлэҕэ ыстаарсай көмөлөһөөччүтэ Надежда Дворецкая Павел Афанасьевка силиэдэбэтэллэр харахтара тоҕо кырыыламмытын кэпсээтэ:

– Арассыыйа Силиэстийэлиир кэмитиэтин Саха сиринээҕи управлениетын Дьокуускай куораттааҕы салаата АГАТУ Өктөмнөөҕү филиалын салайааччытыгар холуобунай дьыаланы көбүппүтэ. Кини Арассыыйа ХК 285 ыст. 3 ч., ол эбэтэр дуоһунаһын аһара түһүүгэ уорбаланар. Силиэстийэ сабаҕалыырынан, филиал салайааччыта сокуоннайа суохтук 31 устудьуону үөрэтэбин диэн түөкүннээн 14 мөл. 700 тыһ. солк. тахса бүддьүөт үбүн иҥэриммит. Дьиҥэ, ити 31 устудьуон отой да үөрэммэттэр эбит, таах кумааҕыга эрэ киирэ сылдьыбыттар. Силиэдэбэтэл хадатаайыстыбатынан Афанасьевы хаайбыттара.

Өрөспүүбүлүкэ борокуруорун эбээһинэһин толорооччу Айдар Иванов силиэстийэ хаамыытын бу курдук быһаарбыт:

– Ити холуобунай дьыаланы бу иннинэ АГАТУ ректора 136 отой да суох устудьуоннары бүддьүөт харчытыгар ылан, 250 мөл. солк. сокуоннайа суох ылбыт дьыалатын чэрчитинэн силиэстийэлии сылдьан көбүппүттэрэ.

Маны таһынан, АГАТУ салалтатыттан өссө икки киһи үөһэ ыйыллыбыт буруйу оҥорууга сыһыаннаахтара билиннэ, кинилэр Өктөмнөөҕү филиал салайааччыта буруйу оҥорбутун арыйарга бигэргэтэр матырыйааллары биэрэллэр уонна суут иннинээҕи сөбүлэҥи түһэрсэн силиэстиэйэни кытары бииргэ үлэлииргэ бэлэмнэрин биллэрбиттэрэ. Биирдэстэригэр дьиэтиттэн ханна да барбатын курдук, баппыыска туттарылынна, иккис киһиэхэ – дьиэ хаайыыта.

Афанасьевы тохсунньу 29 күнүгэр туппуттар уонна сокуон ыйарынан 48 чааска ылан укпуттар. Сарсыныгар, субуотаҕа силиэдэбэтэл суукка кинини хаайарга хадатаайыстыбалаабыт. Ол эрээри Дьокуускай куораттааҕы суут ити күн үлэлээбит дьуһуурунай судьуйата “Афанасьевы билэр киһим, онон кинини сууттууртан батынабын” диэн быраабын туһаммыт. Борокуруор суут кэмигэр судьуйаны кытары көрсүбүт буолуон сөп буоллаҕа.

Сорохтор бу “өлбүт дууһалары” кытары сыһыаннаах айдааннаах дьыаланы “соруйан оҥоруу” диэн этэллэр. “Иван Слепцов ким эрэ бэлиитикэҕэ кирдээх оонньуутугар киирэн биэрдэ” эҥин диэччилэр эмиэ бааллар. Онуоха кини Тыа хаһаайыстыбатын академиятын федеральнай таһымҥа таһаарбытын, сотору кэминэн дуоктар буолар дьиссэртээссийэтин көмүскээри сылдьыбытын эҥин ахталлар. Итиччэ ситиһиилээхтик ат уорҕатыгар олорсо сылдьан эмискэ таҥнары курулаабытын ылымматтар эбит. Чэ, туох да диэбит иһин, ити ыйытыыларга суут-сокуон сиэрдээх хараҕынан көрөн сөптөөх быһаарыыны ылынарыгар эрэнэбит.

Тарҕат:

Санааҕын суруй