Киир

Киир

Василий Самсонов, Дьокуускай:

– Чита уобалаһын Мииринэй ыстаансыйатыгар баар “учебкаҕа” сылдьыбытым. Онно биирдэ ыстаапка байыаннай чааспыт знамятын таһыгар поска туруордулар. Поскар түөртүү чаас буола-буола кэлэҕин. Ол курдук түүн 2 чааска поспар кэлбитим. Ол туран биир хостон буруо тахсарын көрөн түрүбүөгэ биллэрбитим. Ититэр тэрили холбоон баран умнан кэбиспиттэр этэ. Ол умайан тахсыбыт.

Сарсыныгар миэхэ махтал биллэрбиттэрэ, биир күҥҥэ “уволнительнай” биэрбиттэрэ. Мииринэй ыстаансыйа куорат буолбатах буоллаҕа. Онон ханна барыаҥый? Арай кулуупка киинэ көрдөрөллөрө. Онно тиийэн “Спартак” диэн киинэни көрбүппүн өйдүүбүн.

Уонна өйбөр-санаабар биир түгэн бигэтик иҥэ сылдьар. “Восток-85” диэн улахан байыаннай үөрэнии (учение) буолбута. Мин ыстаапка сулууспалыыр буолан ити үөрэниини чочумаас хайа үрдүгэр туран көрбүтүм. Барыта ытыска уурбут курдук көстөрө. Дьиҥнээх сэрии курдуга: сөмөлүөттэр, бөртөлүөттэр, тааҥкалар...

Тааҥкалар тааҥкалары кыраасканан ытыалыыллара. Таптарбыт тааҥка экипаһа ракетницанан үөһэ ытан – “умайбытын” туһунан биллэрэр уонна турунан кэбиһэр. Итинник ытыалаһыы кэмигэр биир саллаат БТРтан тахсан хонуу устун сүүрбүтэ. Ол сүүрэн иһэн тааҥка кыраасканан ытыытыгар түбэспитэ. Тааҥка “20 мм” орудиетын күүһэ туох да күүстээх буоллаҕа. Ол саллаат өлбүтэ. Биһиги итини барытын биноклунан көрөн турбуппут. Тута “һуу-һаа”, түптэ-түрүлүөн... Байыаннай үөрэнии тута тохтотуллубута.

Урукку саллааттар кэпсээннэрин Федор РАХЛЕЕВ сурукка тистэ.

Тарҕат:

Санааҕын суруй