Киир

Киир

“Кулун тутар ый бүтүүтэ Дьокуускай куоракка үс уопcастыбыннай туалеттаах саҥа сылаас тохтобуллар аһыллыахтара, ” – диэн иһитиннэрдэ куорат баһылыгын эбээһинэһин толороччу Евгений Григорьев, бэҕэһээҥҥи пресс-конференция кэмигэр, суруналыыстар ыйытыыларыгар хоруйдаан. Ол туһунан биһиги биир идэлээхтэрбит “Эхо Столицы” хаһыаттан иһитиннэрэллэр.

Суруналыыстары куорат дьаһалтата саҥа сылаас тохтобуллары тутуута интириэһиргэттэ. Куорат баһылыгын эбээһинэһин толорооччу эппиэттээбитинэн, Дьокуускай уопсастыбыннай тырааныспарын систиэмэтэ, чуолаан сылаас тохтобуллар үлэлиир быһыыта-майгыта саҥаттан көрүүгэ наадыйар. Урут урбаанньыкка муниципальнай сир арендаҕа бэриллэрэ, онно кини сылаас тохтобул тутара уонна бэйэтэ быһаарара эбийиэк үлэлиир эрэсиимин, көрүүтүн-харайыытын.

“Мантан инньэ, тохтобуллары МУП “ЯПАК” бас билиитигэр биэрэргэ быһаарыы ылылынна. Бу тэрилтэ сүрүн оператор буоларын быһыытынан аны, урбаанньыттарга үлэлииргэ бары өртүнэн бэлэм тохтобуллары куортамҥа биэрэр буолуоҕа, эрдэттэн бигэргэммит чуолкай эрэсиимнээх. Сарсыарда 6 чаасттан киэһэ 10 чааска диэри,” – диэн бэлиэтээтэ Евгений Григорьев.

Кулун тутар ый бүтүүтэ, Дьокуускай куоракка биир кэлим истиилинэн тутуллубут саҥа, сылаас тохтобуллар маннык аадырыстарынан арыллыахтара: Воинская, Лермонтова (Департамент Жилищных Отношений утары) уонна Пояркова (Саха национальнай гимназиятын таһыгар) уулуссаларынан. Барыта бу сыл устата, оннук быһыылаах-таһаалаах 20 сылаас тохтобул арыллара күүтүллэр.

sakhapress

Тарҕат:

Санааҕын суруй