Киир

Киир

Мииринэйгэ хаарбах, эргэ дьиэ эрэ дэлэй. Куорат 200-чэ мас дьиэлэриттэн, баһыйар үгүстэрэ – самнархайдар. Таас дьиэлэр үгүстэрин туруктара эмиэ бөрүкүтэ суох.

Бу хаартыскаларга көстөр Ленинград бэрэспиэгин дьиэлэрин ССРС үгэннээн турар кэмигэр, 1965-70 сылларга тутуталаабыттара. 25-тэн 19-с диэри дьиэлэр барыларын Ленинград архитектордара оҥорбуттара.

Түөрт этээстээх “Хрущевка” дьиэлэр үйэ аҥаарыттан ордук сулууспалаатылар. Сыыйа-баайа уоттарын, ууларын-хаардарын ситимнэрэ эргэрэн, истиэнэлэрэ хайыта барыталаан, кырыыһаларынан тэститэлээн, кэлин биллэ мөлтөөтүлэр.

1

Былаан кыраапыгар киирбит, уот күүрүүтүн ситимин уонна сарай хаппытаалынай өрөмүөнүн Дьокуускай куораттааҕы «Экофорс» бэдэрээччит-тэрилтэ ыытта. Саамай ыарахан уонна кутталлаах үлэтэ – сарай өрөмүөнэ. Уот күүрүүтүн ситимин саҥардыы болдьохтоох кэмигэр түмүктэммит эбит буоллаҕына, 2020 сыл алтынньы 8 күнүгэр туттарыллыахтаах дьиэ сарайын өрөмүөнэ бүтэн быстыбатаҕа. Уһаан-кэҥээн хаалбыта. Бу үлэни ичигэс кэмнэр саҕана үмүрүтүөххэ баара. Мииринэйгэ бытарҕан тымныылар түспүттэригэр таас дьиэ сарайын бүрүөһүнүн уларытыы ахсынньы бүтэһигиттэн олунньуга диэри тохтотуллубута. Хаартыскаҕа көрөрүт курдук, түөрт этээстээх хрущевка дьиэ урукку металлочерепица сарайа арыллан баран, өр баҕайы сыппыта.

Бука, хрущевка олохтоохторугар аһаҕас сарайдаах, аам-даам тымныыга олорбуттара бэрдэ суох буолуохтаах Кыһыҥҥы кырыыһа олус халтырхай. Саатар куруук хаар кыыдамныыр, тыалын күүһэ бэрт.Сыыһа туттунан халтырыйан, аллараа сурулаан түһэр куттал куруук баар. Онон, үрдүккэ үлэлии үөрэммит дьон дьарыктаннылар. Олортон хас да саха уолаттара. Үлэлэрэ – ыарахан.

2

СНиП нуорматыттан хадьайыылаах ууруллубут металлочерепицаны уонна дьэбиннирбит тимир арааһын көтүрдүлэр, урукку тутаачылартан хаалбыт бөҕү-саҕы ыраастаан массыыналарынан тиэйдилэр. Кырыыһаны бүрүйүөх иннинэ аналлаах матырыйаалынан үллүктээн бөҕөргөттүлэр. Самыыр түстэҕинэ мунньуллар ууну дьалбарытар халдьаалары оҥордулар.

Аҕыйах хонуктааҕыта Ленинград проспегар турар 19-с дьиэтэ саҥардыллан, дьэ бүттэ.

Станислав Алексеев, Мииринэй куорат.

Тарҕат:

Санааҕын суруй