Куораппытыгар баараҕай эргиэн киинэ баар буолуохтааҕа – кэм ирдэбилэ. Ол сиэринэн, алмаастаах кыраай киин куоратыгар аныгылыы “Армада” атыы-эргиэн киинэ тутуллан барбыта.
Бу уһун-унньуктаах тутуу 2015 сыллаахха саҕаламмыта. Хаста-хаста тохтоон, улугуран турбутун ааҕан сиппэккин. Быйыл эргиэн киинин сыбаайатын уурбуттарыттан ылата, алтыс сыла буолла. Тутууну «Веста» тэрилтэ саҕалаабыта. Тутуу бэдэрээччитэ былырыыҥҥыттан ылата уларыйда. Билигин Новосибирскайдааҕы “Сибирские ресурсы” фирма үлэлиир. “Армада” тутуута, 14.989 кыб.м иэннээх киэҥ сири хабар. Тутулла турар эбийиэккэ156 миэстэлээх остолобуой, 96 миэстэлээх көстүүнэй баар буолара бырайыактаммыта, 150 эргиэн миэстэтэ баар буолара былааннанар. Онон Мииринэй куоратыгар эргиэн-урбаан ситимигэр уларыйыылар киирэллэрэ күүтэллэр.
Бу эргиэн киинин үлэтин саҕаланыыта атыттарга охсуулаах буолуон сөп диэн сорохтор сөбүлээбэттэр. Атыттар “бачча кыра куоракка тугу барыыһыраары, бачча баараҕай эргиэн киинин дьэндэтэллэрэ буолуой” диэн эмиэ мунаараллар.
Туох да диэбиттэрин иһин, “Армада” эргиэн киинэ 2021 сылга үлэҕэ киириэхтээх диэн бэдэрээччит үлэтин пааспарыгар дьэҥкэтик сурулла сылдьар.Ону бириэмэ көрдөрүөҕэ.
Станислав Алексеев, Мииринэй куорат. Ааптар хаартыската.
