Киир

Киир

 

 

Эһиги болҕомтоҕутугар бүгүн, ааҕааччыларбыт Иван Пономарев, Андрей Константинов итиэннэ  Лэппириэн кыыһа - Сир Симэҕэ.

Ангелина Спиридонова - саха ынаҕын туһунан хоһооннорун таһаарабыт.

 

Сахабыт ынаҕа барахсан.

Өбүгэ үгэһин утумнаан

Хороҕор муостааҕы иитэбит,

Төрүппүт сүөһүтүн маанылаан

Сахабыт ынаҕын туойабыт.

Хос ырыата

Сайаҕас Мылахсын Айыылаах

Сүтүөхчэ-сүппэтэх дьылҕалаах,

Төрүппүт ынаҕа барахсан

Туругур үйэни уҥуордаан.

Хос ырыата

Алааска айаатыыр оҕустаах

Хойуу үүт, эмис эт быйаҥнаах,

Саханы аһатан аҕалбыт

Сахабыт ынаҕа барахсан.

Хос ырыата

Саадьаҕай, эбирдэх ойуулаах

Сытыары, сымнаҕас майгылаах,

Кыһыҥҥы тымныыга тулуурдаах

Сахабыт ынаҕа барахсан.

Хос ырыата

Маанылаах сахабыт ынаҕа

Бу тыйыс дойдуга эрэ баар,

Тэнийэ, барҕара, үксүү тур

Сахабыт ынаҕа барахсан.

Хос ырыата

Иван Пономарев, Чурапчы.

 

 

Махтал Сахам ынаҕар.

Өбүгэбит быдан дьылтан

Бүөбэйдээн маанылаан аҕалбыт

Өлбөт миҥэ бастыҥын,

Баайын, ыанар ынаҕын.

Өлгөм астаах үүтүнэн

Өргүйэр быстыбат үөстэммит,

Тыйыс тымныы дойдуга

Тыыннаах хаалан үссэммит.

Махтал барҕа тылларын

Махтал сырдык иэйиитин

Бүгүн киниэхэ анаатым

Ырыа гынан ыллаатым.

Махтал сахам ынаҕар,

Махтал сахам оҕуһугар,

Махтал сүөһү ииттэр

Мааны тыам дьонугар.

Андрей Константинов, Дьокуускай.

 

 

Ынаҕы тоҕо иитэллэрий?

Сылгыны тоҕо таптыылларый?

Өбүгэлэртэн ирдиириҥ!

Кистэлэҥэ бэрт дириҥ!

Ньирэй - кыыс оҕо харысхала.

Кулунчук - уол оҕо уйгута.

Ынах - ийэ ууһун илдьитэ.

Оҕус - аҕа ууһун удьуора.

Былыр өбүгэлэр барахсаттар

Иччилээн хаалларбыт эбиттэр.

Оҕону киһилии киһи гынаары

Саргылаах олоҕун түстээри.

Өйдөөн көрүҥ эрэ!

Болҕойон истиҥ эрэ!

Билиҥҥи киһи тоҕо соһуччу өлөрүй?

Былыр тоҕо сүөһүнэн ылла дииллэрий?

Удьуорбут кистэлэҥ күүһэ -

Тыыннаах буолуу күлүүһэ.

Мындыр саха көрүүтүгэр

Муударай дьоммут этиитигэр.

Алаас, алаас муҥунан

Хороҕор муостааҕы хоротуҥ!

Сыһыы, сыһыы муҥунан

Сыспай сиэллээҕи ууһатыҥ!

Ийэ тылбыт дорҕооно -

Ийэ ууһун дуораана.

Ийэ, ийэ дьиэтитэр,

Аҕа ууһун тэнитэр.

Сүөһүлээхтэр дьэ чиҥнэр!

Сылгылаахтар сиэрдээхтэр!

Олох дьиҥнээх тутулун

Отой тутуҥ тускулун!

Туску!

Лэппириэн кыыһа - Сир Симэҕэ.

Ангелина Спиридонова, Дьокуускай.

 

Тарҕат:

Санааҕын суруй