Киир

Киир

Мин олохпор сүрүн ситиһиим – тыам сирин дьонун туһугар эппиэтинэс сүгэн,норуотум туһугар үлэлиирим-хамныырым буолар»

А.И. Степанов

zam 1

ministr 14

2021 сыл, кулун тутар 27 күнүгэр Саха сирин биллэр-көстөр судаарыстыбыннай уонна уопсастыбыннай диэйэтэлэ Айаал Иванович төрөөбүтэ 55 сылын туолар.

Айаал Степанов кылгас, ол эрээри чаҕылхай олоҕу олорбута. Сүүрбэ сэттэ сааһыгар – тыа хаһаайыстыбатын билимин хандьыдаата, отут сааһыгар – «Покровское» ГУП ОПХ дириэктэрэ, отут түөрт сааһыгар – Саха өрөспүүбүлүкэтин бэрэсидьиэнин дьаһалтатыгар тыа хаһаайыстыбатын, кооперация, сир бэлиитикэтин салайааччытын солбуйааччыта, өрөспүүбүлүкэни Михаил Николаев салайсар кэмигэр – күүстээх, күүрээннээх үлэ сыллара. Отут алта сааһыгар – тыа хаһаайыстыбатын Үөрэтэр Чинчийэр Үнүстүтүүтүн дириэктэрэ, оттон түөрт уон бииригэр – Саха өрөспүүбүлүкэтин бырабыытылыстыбатын бэрэссэдээтэлин солбуйааччыта.

dav

Бу бэлиэ күнү көрсө, М.Г. Сафронов аатынан Үөрэтэр Чинчийэр Үнүстүтүүккэ өрө көтөҕүүлээх быһыыга-майгыга Айаал Степанов сырдык аатын үйэтитэр мэҥэ таас арыллыыта буолла. Тэрээһиҥҥэ саха саарынын чугас аймах-билэ дьоно, бииргэ үлэлээбит үөлээннээхтэрэ, доҕотторо муһуннулар. Ахтыы тыл эттилэр М.Г. Сафронов аатынан тыа хаһаайыстыбатын Үөрэтэр Чинчийэр Үнүстүтүүтүн дириэктэрэ, Арассыыйа Билим Академиятын Сибиирдээҕи Салаатын чилиэн-кэрэспэндьиэнэ Михаил Лебедев, Саха өрөспүүбүлүкэтин Судаарыстыбыннай Мунньаҕын бастайааннай кэмитиэтин бэрэссэдээтэлэ Андрей Находкин уо.д.а.

prav 41

А.И.Степанов – Саха өрөспүүбүлүкэтин билимин уонна тиэхиникэтин эйгэтигэр Судаарыстыбыннай бириэмиэйэ лауереата (1996 с), Арассыыйатааҕы Айылҕа билимин Академиятын чилиэнэ (1999 с), Норуоттар икки ардыларынааҕы аграрнай үөрэхтээһин Академиятын чилиэнэ (2008 с), Арассыыйатааҕы, Саха өрөспүүбүлүкэтин агропромышленнай комплексын Бочуоттаах үлэһитэ (2011 с), тыа хаһаайыстыбатын билимин доктора.

Мэҥэ таас арыллыытын кэнниттэн, үнүстүтүүт актовай саалатыгар Айаал Степанов сырдык кэриэһигэр аналаах ахтыы киэһэтэ уонна кини учуонай-аграрник кэллиэгэлэрин көмөтүнэн оҥоһуллубут – Айаал Степанов үлэлээн-кэлбит айбыт-туппут суолун кэрэһэлиир видеосюжет көрүүтэ буолла. Киинэ көрөөччүгэ саха чулуу уола киһи быһыытынан атаҕар туруутун көрдөрдө, оҕо сааһыттан Мэҥэ Хаҥалас кэрэхсэбиллээх алаастарыттан саҕаламмыт төрөөбүт дойдуга таптал, кут-сүр иитиллиитэ, үлэни өрө тутуу, элбэҕи билэ-көрө сатааһын, төрүт уус-удьуор дьон утума – барыта биир ситиминэн бу киинэҕэ көрдөрүллэр.

ministr 29

Кэнники сылларга кини суруйар этэ: «Сир хаһаайыннаах буолуохтаах, бааһыналар, ходуһалар, мэччирэҥнэр дьиҥнээх хаһаайыҥҥа бас билиигэ бэриллэн дохуот киллэриэхтээхтэр». Сиэрдээх буолуу, чиэһинэй майгы, ханнык баҕар дьыалаҕа эппиэтинэстээх сыһыан, мындыр өй – курдук кини уһулуччу киһи быһыытынан хаачыстыбылара бу киэһэ элбэхтик ахтылыннылар. Киинэҕэ көстүбүт хаартысканан уонна видеонан баай толору матырыйаал көрөөччүгэ Айаал Степанов сырдык мөссүөнүн уонна кини билимҥэ судаарыстыбыннай үлэҕэ киллэрсибит сүдү кылаатын толору тиэртилэр.

Төрөөбүт дойду туһугар, сахатын дьонун туһугар кыһыамньы – кини сыралаах үлэтин сырдык сүүрээнигэр кубулуйбута, киһи аймах олоҕун сүрүн тутулугар – тыа сирин хаһаайыстыбатыгар, саха норуотун үйэлэри нөҥүөлээн илдьэ кэлбит төрүт дьарыгар. Айаал Иванович профессионал, талааннаах салайааччы, аграрнай билим , оҥорон таһаарыы көхтөөх тэрийээччитэ, Саха сирин бэриниилээх гражданина, бар дьон, норуот убаастабылыни ылыан ылбыт киһи киэнэ кэрэмэһэ этэ.

«…Киһи олоҕун суолтата бэйэ кэнниттэн өлбөт-сүппэт аат-суол хаалларыыга, олорбут олоххуттан хаһан да кэмсиммэттик олорууга. Айаал Иванович бэйэтин кэнниттэн дириҥ суол-иис хааларан барда, чугас дьонугар, тыа сирин боростуой үлэһит дьонугар, сахатын норуотугар» - диэн суруйда Айаал Степанов туһунан ахтыыларыгар, Саха сирин Бастакы Бэрэсидьиэнэ Михаил Николаев.

Тарҕат:

Санааҕын суруй